Greater Aizawl Water Supply Scheme Phase II khawl Electric Motor 1700 KW pakhat chu September ni 15, 2023 khan a chhia a. He khawl hian nikhatah tui litre Maktaduai 8 vel a pump chhuak ṭhin a ni. Khawl chhiat avang hian nasa takin Aizawl khawpui chhung tuisem pawh a nghawng a. Hemi avanga mipuiin harsatna an tawh mek chu rang taka sutkian a nih theih nan Chief Minister Zoramthanga chuan khawl thar leh a behbawm (Accessories) ṭul dang leina tur sum SASCI hnuai aṭangin Rs. 1.50 Crore a pe chhuak nghal a ni.
Finance Department changtu Zoramthanga, Chief Minister chuan Aizawl khawpui chawmtu tui pump khawl chhiat avanga mipuite leh department thawktuten harsatna an tawk chu pawi a tih thu a sawi a. Mipui leh thawktute harsatna sutkian a nih thuai theih nan khawl thar leina tur chu a rang thei ang bera ngaihtuah nghal a nih thu leh, mipuite harsatna pawh sutkian thuai a nih a beisei thu a sawi.
MNF party chuan, “Mipuite harsatna sutkian a nih theihna tura rang taka hma latu leh khawl thar leina ngaihtuah nghaltu Chief Minister Pu Zoramthanga, Finance Minister kan nei hi a chhuanawm tak zet a ni,” an ti.
