Vawiin khan Congress Thalaite chuan thuchhuah siamin, “August ni 29, 2022-a Hnam Runa MNF chhung inkhawmah Minister leh MNF Adviser ni bawk Robert Romawia Royte chuan, ‘MNF party chuan direct-in SEDP kan sem mek a, vawiina Rs. 25,000/- dawng turte hian MNF-a sawrkar zel chuan nuaithum aia tlem lo an dawng dawn tih hi, kan hotute relna atang khan a chiang em em a ni, a ti,’ a ti a. Hei hian an lo intiam tawh angin an sorkar chhung ngeiin SEDP cheng nuai thum chu chhung tin hnenah an sem loh tur zia chiang takin a tarlang ta a, mipui an bum ni lovin, mipui hmaah dawt lian tak an sawi a, ngaihdam dil rawh se. MNF hi an sawrkar zel dawn tih khawiah mah a awm lo a, tun dinhmun enin mipuiin rinna an nghat zo tawh lo. SEDP hi a hlawhchham tih tunah hian chiang takin a lang ta a ni,” ani ti.
MPYCC chuan, “A sawi zelnaah Sports Minister chuan, “Covid-te a reh chho tan anih chuan kumtharah budget kan nei thar leh ang a, kan Taxation minister leh Revenue minister te zarah kan budget hi a pun chhoh ngei a rinawm a. Chuvangin, SEDP a kumin a kan cover loh hi nakumah pawh kan cover vek theih a rinawm a,” a ti a. Hei hian chiang taka a tarlan chu mipui nasa zawka sawr fe tumna mai a ni, mipuia chhiah nasa zawka khawna SEDP sem tumna hi thil zahthlak tak a ni.
“SEDP hi nuaithum dawnah hian a tawp mai dawn lova, kan sawrkar chuan kan kal zel dawn a ni, a ti,” tia MNF thuchhuahin Pu Robert Romawia’n a sawi an tarlan ngat phei hi chu mipui zah lohna tawp khawk a ni, kum li an sorkar chhung cheng 25000 an sem tur thu chauh hriat a la ni a, nuai thuma a tawp leh tawp loh tur hi sawi ri tawh suh se. Congress Party chu ‘kan ti ang’ tia kan tihah kan ding nghet thin a, kan intiamnaa kan dinngheh thin hi Zoram mipuiin an hria a ni. Pu Lalsawta hova Mizoram mipuite tan Sorkar Tha siam tumin kan inpuahchah chho mek a, heng Sorkar Tha siam kan tumnaah pawh kan intiamnaa kan dingnghet tawh thin angin kan ding nghet dawn a ni, chumi ti thei tur chuan Mizoram mipuite zawng zawngte kan sawm tak meuh meuh a che u,” tiin Congress Thalai chuan thuchhuahah an tarlang.