Chawngtlai khuain Documents rintlak tak hmangin, Mizo Lal, Pasaltha, Freedom fighter te Lung, Pi pu Chhuahtlang mual siamin an phun dawn

Chawngtlai Welfare Committee, Aizawl leh Mizo Historical Village Society, Joint YMA leh Chawngtlai Branch YMA te chuan April ni 1, 2022 khan bialtu MLA, Dy. Chief Minister Pu Tawnluia chu a Office chamber-ah Joint meeting an neihpui a. Buai leh ṭul tak chunga hun remchang min siam sak avanga lawmthu sawiin, “Chawngtlaiah *ZORAM TANA ROHLU TLING TUR* din tuma Dy.Chief Minister hova hmalak mek a ni a. Peih fel anih hunah ropui taka hawn tum a ni,” an ti.

CWC, Aizawl leh MHVS, Chawngtlai te chuan, Dy. Chief Minister Pu Tawnluia hnenah hian, Lal huaisen, Mizoram pawih ral laka chhanhimtu Lal Nikuala lung, 32fts. a sang phun pahin, Mizo Lal ropui, Pasaltha, Freedom fighters Chawngtlai, Mizo lalte kaptu Sap sipai lalte Lung an phun dawn a, a hmun hming atan *’Pi pu Chhuahtlang’* Pu Tawnluia, ho hian phuah a ni. He hmunah hian Mizo Lal leh Pasalthate, mizo hnam tana Zalenna sualtu(Freedom Fighters),Chawngtlai tlangval boral tate lung phun tur a nih bakah, mizo nunhlui lanchhuah theihna thil hrang hrang siam a ni dawn a, tun hun hi a bul ṭanna a ni dawn a ni.

“Kan thil ruahmante min phurpui a, ruahmanna ṭha zawk min kawh hmuh a, ruahmanna pawh a hlawhtlin ngei theih nana *’Pi pu Chhuahtlang mual’* hming thlenga min buatsaih saktu, Pu Tawnluia, Dy. Chief Minister chungah Chawngtlai khaw aiawha kalte kan lawm tak zet a ni.

“Lal Nikuala lungphun baka ‘Pi pu Chhuahtlang’ hun hman tur chungchangah hian Pu R. Lalzirliana, Art & Culture Minister zahawm tak leh Pu Robert Romawia, Tourism Minister zahawm takte pawh hmuh niin, anni pawhin min lo tuipui hle a, an chungah kan lawm hle.

“Mipui tlawh theih tura hawn anih hunah chanchinbu mi (Print media, Electronic media) leh Youtube lama mi ṭhahnemngaite nen Chawngtlaiah, Dy. CM hovin lam kan thai dawn a ni. Ruahmanna ang chuan thlenkim ni nen ni 3 hun hman tum a ni,” an ti bawk.