Vawiin khan CM Conference Hall ah Chapchar Kut 2025 Organising Committee te chu an chairman Pu Lalduhoma, Chief Minister hovin an thukhawm a. Kumin Chapchar Kut hman dan tur an rel a, thupui atan “Zo nun ze mawi – Hawihhawmna” tih chu thlan a ni.
Chapchar Kut hmanna pui ber hi Aizawl lammualah March ni 6 leh ni 7 ah neih tura duan a ni a. Ni 6 ni hian Pu K. Sapdanga, Home Minister chu khuallian a ni ang a, ni 7 niah Chief Minister Pu Lalduhoma khuallian a ni ang. Kut denchhen programme pawimawh dang te erawh chu March ni 3 atanga kalpui tan tur a ni.
March ni 3 ah Chapchar Kut pual Tlan (Kut Run) buatsaih a ni ang a, ni 4 ah Flower Show leh Painting & Exhibition Show kalpui tan a ni ang. March ni 5 ah Chapchar Kut heritage tour buat a ni ang a, he mi ni vek hian Falkawn Zokhuaah Mizo Pi leh pute Nun (Mizo Typical Life) Demonstration buatsaih tan a ni ang. A tuk ni 6-ah pawh neih chhunzawm tur a ni. Ni 5 ah vek hian Kut pual Handloom, Textile & Handicraft Exhibition and Food Processing & Food Court hawn a ni ang a, exhibition & food court hian ni 7 thleng a awh ang.
Chapchar Kut hlawhtling leh hlimawm buatsaih a nih theih nana tihtur pawimawh te sawiin, mawhphurtu tur te pawh an inruat a, senso tur te pawh an rel bawk.
Chapchar Kut hmanna tur sum hi tun hmain a hranin sawrkarin budget-ah a dah hrang ngai lo va. Kumin sawrkar budget atang khan Rs. 100 lakh dah tan a ni. Hei hian mamawh zawng zawng a daih dawn loh avangin sum hmuh belh theihna tur chi pawh vawiin hian sawiho a ni.
