Nimin 27.02.2025(Ningani) Chawhma dar 10:30 khan PHE Department leh Central YMA tangkawp buatsaih ‘Tlawng lui humhlah leh Plastic sawngbawl zir ho na’ chu Central YMA Hall Tuikhuahtlang ah neih a ni.
He hun hi Prof Lalnuntluanga, Vice President Central YMA in kaihruaiin Pu C.Lalhmachhuana, CEC in hunserh a hmang. Prof Malsawmliana, General Secretary Central YMA in inhmelhriattirna hun a hmang bawk
Pu Lalhmachhuana, President Central YMA chuan Mihringin ten dam khawchhuah nan a, kan mamawh em em Tui kan humhlahna kawngah PHE Department te nen thawhhona tha tak neih anih chu lawmawm tiin Tui hna humhalh leh tihpun chu kan ram tan a pawimawh thu tarlang in hemi kawngah hian YMA chuan a theih tawp in hmalakna a kalpui mek a, YMA chuan kan ram leh hnam tana tha tur a nih chuan huanglo / kuanglo a neilo a, ram leh hnam tan theihtawp a chhuah zel dawn a ni a ti.
Khuallian Prof Lalnilawma, Hon’ble Minister PHE etc. chuan thusawiin vawiin a hetiang programme pawimawh tak buatsaih a ni chu lawmawm tiin, Aizawl khawpui chawmtui Tlawng lui Tui a harsatna awm thin chu sutkian anih theihna tur leh kum tluana Aizawl khawpui in Tui hnianghnar a kan dawn theihna tura hmalak mek anih thu tarlang in, chutih rualin Tui hna humhalh tur leh Tlawng lui a lo thianghlim theihna tur a hmalakna hi Sorkar leh mimal mai a tih chi anih loh avangin Mipui ten kan za vai a kan tanrual a pawimawh thu a tarlang bawk a ni. Minister chuan kan ram leh hnam in faina leh Tuihna humhalhna kawnga hmalakna ah YMA leh PHE Department thawhhona chu a hlu tiin thawhhona tha nei zel turin duhsakna a hlan a ni.
Vawiin zirhona programme ah hian Tlawng lui bul hnai / tlawnglui ram thleng a ram nei khua / Branch YMA 67 aiawh te an kal khawm a ni.
Chawhnu lamah Thupui zirhona hun hman a ni a, Pu Roneihthanga, Treasurer CYMA in a kaihruai a. Er. H. Duhkima, Engineer-in- Chief, PHE in Tlawng lui humhalh a tulna leh Plastic hman nasat that lohna thupui a sawi a. Sawihona hun hman a ni a, sawihona hi Er. Lalrinzuala Ralte SE.PHE a kaihruai a ni.
