Tukin zing dar 8:00 khan Central YMA chuan Aizawl leh a chheh vela Zohnahthlak Manipur leh Myanmar atanga raltlan awm khawmna Relief Camp te pualin Krismas thilpek an sem chhuak.
Central YMA chuan Aizawl chhehvela Refugee Relief Camp – Sairang, Sihhmui Camp I & II, BSUP Edenthar, RAY Falkland, Tuirial leh Leitan a awm chhungkaw 257 te tan cheng Nuaih li man Buhfai, Dal, Tel & Nutrela te chu pick up motor 5 in an sem chhuak a ni.
Raltlan te tana Krismas thilpek an sem chhuah te vai liam a hun tawi hmanna ah hian Central YMA President Pu Lalhmachhuana chuan Zohnahthlak kan unau ten in sahim nana Mizoram in awm chhungin mahni awmna theuhah Mizo nun ze mawi hrang hrang nunpui a, ram leilung fate khawsak phung baka tumah khawsa bik lo tur in thilpek dawnga lo kal khawm raltlan camp hrang hrang aiawh te chu a chah a. Ei leh bar an zawnna kawngah pawh tu tan maha hnawksaka awm lo turin a chah bawk. Pu Chhuantea chuan kan hunpui Krismas leh Kumthar lo thleng turah, in vawi hnih khat chaw ei tal lo tum sak ve che u, Central YMA chuan a duh a, kan tih theih tawk hi min lo pawm sak dawn nia tiin kalkhawm te a ngen a ni.
Central YMA chuan Mizoram hmun hrang hranga raltlan Camp a awm te tan kumin Krismas thilpek atan ei leh in tur cheng nuaih 25 hu a sem chhuak tawh a ni.
