Vawiin ni 8, November, 2024 hian Congress Party chuan Congress Bhavan-ah ‘Friday Political Session’ an hmang a, Sinlung Hills Council Member thar Pu Lalrawngbawla, Khawlian bial lawmpuina hun hman nghal a ni.
He hunah hian MPCC President Pu Lal Thanzara chuan thu sawi in, “Sinlung Hills Council inthlan atang hian Congress kan inlungrual in kan inthurual a, nasa takin hma kan sawn a ni tih a langchiang a. Council member pakhat chauh kan tling chung hian Sinlung Hills Council pum puia vote tla zawng zawng ah sawrkar ta MNF hi vote 185 chiahin kan pha lova, sawkar lai ZPM ten keini aiin vote 403 in an hmu tlem zawk te hi hmasawnna a ni a, Prsident ka nihna angin Congress tana thawktute zawng zawng chungah lawmthu ka sawi a ni.
“Sinlung Hills Council inthlanah hian boruak kan han en a, kan chak theih mai dawn hi kan ti a, amaherawh chu a tir atangin hlauh kan nei a, a dawn zan velah sum leh pai a rawn leng anga, chu chu kan do zo lovang tih kan hlau a ni. Kan sawi ang ngeiin sum leh pai mai ni lovin khilai hmunah Petrol Pump an rawn hawng ta emaw tih mai turin party dang ten hma an la a ni. Chutih laiin kan Candidate te chuan sum leh pai hman tur an nei ve lo a ni.
“Congress paty chuan sum leh pai hmangin tlin tumin hma kan la ve ngai lova, kum 1980 khan AICC a an Treasurer Sitaram Kesri chuan khatih laia Preaident Pu Lal Thanhawla chu inthlana kan mamawh tur sum a rawn pe a. Pu Lal Thanhawla chuan an mamawh ang zat theuhin Candidate te a sem a, chuta a bang la awm zawng chu a kir leh vek a ni. Chu chu Congress ina sum leh pai kan hman dan, kan kalphung a ni a, sum leh pai hi kan hmachhuan ve ngai lo a ni.
“Small leh Mini Hydel Project engemaw zat hi kan sawrkar hian Delhi mihausa Gundana hnenah an enkawl turin hlan a tum tih kha Political Session hmasa ah ka sawi tawh a, an hlan duh loh phah ka rin laiin vawiin ni ah chuan hlan tumin hma an la la zel a ni tih report ka dawng a. Serlui hian 12 Megawat a pechhuak thei a, kum 10 chhung khan ₹129,53,98, 000 a ni a, a enkawlna senso chu ₹ 51, 39, 97, 407 a ni a, hlep ₹ 78, 14,00,592 ni. Heti chung hian Delhi vai mihausa hnena outsourse an tum chhan hi hriat a chakawm hle a ni.
“Gundan Green Pvt Ltd hnena hlan a nih hun chuan kum khat chhunga (2023-2024) a power hmuhchhuah ₹18,05,98,000-ah 32% a pe let anga, chu chu ₹ 5,77,91,520 ani a, sawrkarin Gundana hnena a khilai tur chu ₹12,28,00,680 lai a ni.
“Hetiang hi a ni tih Department hotuten an hrechiang em em a, an ui em em a ni. Maicham phase l leh II, Khawiva te, Serlui te, Tuipui te nen an hlep neih dan te sawrkarah an thehlut thlap chungin kan Chief Ministerin hlan a duh tlat a ni awm e.
“Hetianga sawrkarin Vai mihausa hnena a hlan hian sawrkarin heng Hydel Project te enkawltu a a chhawr PE Staff te hi engtin nge an awm zel dawn tih pawh ngaihtuah tham a ni. Chutih lai mekin kan Power Minister zahawm tak chuan Ram rorelna a Pathian ram tundin an tum zia mipuiten an hriat chuan a tawk thu vawiin chanchinbu ah khan a sawi a, a enkawl Department a thawktute pawhin an ui ngawih ngawih hetiang hian ringlo mi kutah hlan an tum chuan Pathian ram Kriatian ram mipuite, a hmutute hian kan hrethiam mai awm e.
“Kan sawrkar chak tak hianin Tuivai Hydel Project, hma kan lo lak tawhna kha chhunzawm tumin hma an la mek niin kan lo hria a, a lawmawm hle a ni. Vawiin chanchinbu ah Power Minister chuan thla 18 chhunga zo tura inremna an ziah thu a sawi a, hetiang khawpa chaka an thawh theih chuan a lawmawm hle a ni. Thla 18 chhungin an thawk zo dawn em tih chu an mi ngenna angin i lo enchhin zel ang u
“Congress party hi Bible a kan hmuh angin President Pu Lal Thanzara te, Sr. Vice President Pu Lalnunmawia Chuaungo te chakna ni lovin, thiltihtheihna ni hek lovin, ka thlarau zawk in le ti a innghatin Congress party member zawng zawng te ka sawm a ni.” a ti.
Pu R. Vanlalvena, General Secretary, MPCC pawhin Sinlung Hills inthlan report pek paha thu sawi in, “Manipur ah han kal ila, ramri atanga Manipur khaw hmasa ber atang khian an retheih zia a hriat a ni. Mizoram chinah chuan khaw tinah Concrete in leh motor leh wheeler tha tak tak te hmuh tur a awm laiin Manipur chin ah chuan in chhe te te hlir an ni. An rethei a, ration buhfai te pitar putar hian Mizoram lama an la ka hmu thin. Chuvangin Pu Lal Thanhawla kaihhruai Congress sawrkar khan duhthusam chuan thawk lo mahse an lo thawk tha takzet a ni.
“Congress sawrkar ah khan mipui ten hamthatna an chang a, hmasawnna a rualkhai a ni. Chuvangin Congress sawrkat khan mipuite a ngaihtuah em em a ni tih a lang chiang a ni.” a ti.
Pu Lalrawngbawla, Secretary, MPCC, Sinlung Hills Council Member thar pawhin thu sawi in, “Sinlung Hills Council mipuite khian ka hmuh chinah Congress hi an ring a, an ngaina a, an ring em em a ni. Kan President Dr Lal Thanhawla khan rambuai atangin min chhanchhuak a, min ngaihtuah a, chuvangin Sinlung Hills Council hi a lo piang a ni.
“Tunah pawh hian rulling kan nih loh vang chauhin min thlang tlinglo niin ka hria a. Kei hi Congress Candidate ka nih vang chauha tling ka ni a, Congress ka ni hi ka lawm a ni.” a ti.
He hunah hi Pu Lalthlengliana, Secretary, MPCV chuan a kaihruai a, Pu PC Rochhunga, Upa Wing Treasurer chuan Report a pe a, Pu IP Junior, Vice President, Mara District Congress Commitee leh Pu Lalthara IAS (Rtd) ten thu an sawi bawk a ni. Pu Lalrawngbawla lawmpuina Mahila leh NSUI(MZ) ten an hlan bawk.
