Supply minister B.Lalchhanzova chuan, “Minister mawhphurhna pek ka nih atang khan kan state in buhfai kan chawk luh dan, sum sen dan leh enkawl dan te uluk takin ka zira, National Food Security (NFSA) kaltlanga buhfai kan dawn te leh kan state puala buhfai kan lei te uluk takin ka en chho a, Card Eng Antyodaya Anna Yojona (AAY) leh Card Pawl Priority Household (PHH) hmang mek, AAY te hian thlakhatah Buhfai 35 kgs a thlawnin an dawng a, PHH te hian mipakhat zelah 5 kgs a thlawnin an dawng a, 3 kgs Rs 15 per kg per person hisapβin an khul ve thin a, card var hmang te hian kg khat Rs 15 in mipakhat tan 8 kgs an khul thin, thlatin hian Buhfai 97,000 qtls vel kan chaw lut thin.
“Food Security scheme hnuaiah 37,000 qtls vel a thlawnin kan dawng thin a, a man tlawm tied over 14,900 velin kan lei bawk a, Open Market Procurement hmangin thla tin 44,000 vel Rs 4,000 per qtl in kan lei thin bawk,” a ti a.
“Kan Buhfai enkawl mek dan ah hian kan hotu te hnenah rawtna hetiang hian ka thlen a a ni,” tiin a hnuai a mi ang hian a thu thlente a tarlang bawk.
1. NFSA in a huam ve loh te tana Buhfai quata kan pek ang hi state dang te hian an lo pe ve lemlo niin a langa, hei hi kan ti tawp kherlo anih pawhin subsidy kan pek hi ennawn nise, kan state in subsidy a sum kan sen thin hi kan ti tlem thei ang tih leh
2. Retailer te lawmman hi ennawn ni se, chu chuan buhfai buk diklo awm thin hi thui taka vang thei ang tih hi ani
3. He ka rawtna hi umzuiin Cabinet Meeting Ni 18/06/2024 a neih chuan (a) CM, Minister, MLA leh Group A Officer te tana Buhfai Quata kan le thin hi tihtawp ni se, hmahruai ila, khawsak harsa lemlo te pawh ngen chhoh zel nise (b) Buhfai Kg khata subsidy Rs 25 kan pek thin chu Rs 10 ah ti hniamin Card var hmang tu ten Rs 15 a an khul thin chu Rs 30 in an khul tawh anga, (buhfai quintal khat hi Rs 4,000/- ang velin sawrkarin a lei thin) (c) Retailer lawmman Kg khata Rs 0.50 ni thin pawh Rs 1.50 ah tih san ani tawh ang. (Retailer te lawmman hi NFSA bik ah Centre in Rs 135 per qtls min tum sak a, state in Rs 45 per qtls kan lo tum ve thin). He subsidy ennawn hian NFSA dawngtu Card Eng leh Card Pawl hmang te a nghawng ve dawn lo a ni.
4. He hmalakna avang hian sawrkarin thlatin Rs 5,25,93,072/- save in kum khatah chuan 63,11,16,864/- kan save thei ang. He hmalakna hi kalpui ta lo ila, kum khata kan sen ral tur chu Rs. 135 crore vel ani anga, he hmalakna avangin Rs 80 crore velin kan buhfai mamawh hi kan in enkawl theih a beiseiawm ani.
5. He hmalakna avang hian mipui ten bufai buk dik an lak theih phah ngei kan beisei a, retailer te leh supply department te buhfai buk diklo thin anga rin kan ni reng hi kan ram tan leh kan khawtlang nun atan pawh a hrisello a, he hi chinfel theih ngei kan beisei ani. He hmalakna hi mipui ten minthlawp a, min tawiawm turin ka ngen a ni.
Ration Card din hmun:
Mizoram ah hian ration card nei mek mi 2,88,757 awmin, mihring 11,72,378 a huam a, he tah hian Food Security dawng thei zat chu mi 7,06,296 an ni a Ration card 1,76,471 awmin, Card var hmang mek Ration Card 1,12,174 atangin member 4,65,708 an awm mek bawk. NFSA dawng thei hi ram pumah 60.22 % kan ni a, a huam ve loh hi 40 % vel kan ni.
NFSA dawng thei hi Thingtlang ah 35 % (4,13,017) ni in, Urban ah 25 % (2,92,764) kan ni. NFSA a lut mek hi kan state dinhmun enin kan tam lo hle a, mamawh tu mi harsa te te an luh belh theihnan kan Chief Minister Pu Lalduhoma chuan India Prime Minister hnenah DO letter Ni 01/07/2024 khan a thawn tawh a, kan Loka Sabha MP Pu Richard Vanlalhmangaiha pawh lo umzui ve turin ka sawipui tawh bawk.