Vawiin February 4, 2025 (Thawhlehni) hian Pu CJ Lianchungnunga In, Bairabi Hmar vengah Congress Kolasib block-II te chuan Political Training leh mithar lawmluhna hun an hmang a. He hun hi MPCC President Pu Lal Thanzara chuan hmanpuiin ZPM, MNF leh Neutral atangin Congress party zawm thar mi 32 a lawmlut bawk.
MPCC President Pu Lal Thanzara chuan, Kolasib Tlangdung kuthnathawktute thawhrimzia kan hmu a. An Hmunphiah seng hun a intan leh mek laiin engkim Research base veka hma la tura insawiin thlai thar chi 4 leina tur pawisa ‘DAH’ tawh nia insawi a, a rate hre sa nia insawi ten ruahmanna a la siam fel loh avangin Hmunphiah lak hun leh hralh hun a liam leh mek a. Khaw tam takah Hmunphiah hralhna awm loh avangin seng tur pawhin thawhchhuah awmzia a awm lova, rilru na takin an mimal remhriat dan danin Hmunphiah an hralh a. Nikum 2024-ah ZPM sorkarin Hmunphiah rate a tihchhiat sak vek avangin kuminah a aia chhe zawk dinhmunah an din phah tih sawiin, Hmunphiah hralhna a vawi hnih nan an tihchhiat sak hi kuthnathawktute hmakhaw ngaih lohna lian tak a ni. ZPM sorkar hi Kuthnathawktute tan mangchhia, research base leh a rate hre sa nia in zuar chu lal duh avanga in bumna mai a ni tih Mizoram mipuiin an hmuchiang mek a ni. ZPM sorkarin a intiamna ang ngeiin kuthnathawktute hi Minimum Support Price pe ngei turin sorkar ka ngen a ni, a ti.
ZPM sorkar kum khatna lekah ZPM chhuahsan runpui a thleng mek tih sawiin, Pu Lal Thanzara chuan belkeh-phuarkhawm sorkar an nih avangin thinlung taka ram tana thawk tura inpawhna leh thawhhona tha an nei lova, sorkar a keh chhiat lohna chu Chief Minister, Minister leh MLA nihna hmanga lalna leh inhaivur an duh avangin an la keh darh lo mai chauh a ni. Chuvang chuan Mizoram tana sorkar tha siam turin mipuiin Congress min ko a, chawl mai mai hman kan ni lo. Tun hnaiah Congress Party boruak a nuam chho em em a. Mizoram hmun tinah mipui beiseina a taka hlenchhuak thin Congress sorkar siam duha tel ve duh ten min ko a, min kohna chhang turin mawngvawmba anga bu let turin kan tul mek a ni, a ti bawk.
MPCC President Pu Lal Thanzara hian Congress sorkar laia hmalakna kal zel Mizoram mamawh awlsam leh man man zawka lakluhna tur Bairabi-a Rail station tlawhin Rel atanga buhfai phurh thlen a nih dan leh Barabi khawchhunga National Highway hnathawh mek a en a. Buhfai phurh chungchanga harsatna hrang hrangah sorkarin ruahmanna fel fai zawk a siam loh avanga Mizoram hmun hrang hranga mipuiin ration buhfai a hun taka an hmu lo thin chu pawi a tih thu sawiin Sairang thlenga Rel a luh huna Mizoramin awlsam taka kan mamawh lakluh a nih hun a nghahhlelhawm hle a. Heng ruahmanna tha kalpui hi ZPM sorkar hian hming thlak ringawt ngaihtuah lova a tihpuitlinna tura chak zawka tha a thawh a ngai a ni, a ti bawk.
MPCC President Pu Lal Thanzara hi Er. Sanghrima, Secretary MPCC, Hosana Khiangte, Secretary MPCC, Lalnuntluanga, Executive Member MPCC, Lalramzidinga, Secretary ADCC, Pu C. Lalrochhara, GS MPYCC, Pu Laldingluaia, Kolasib Block-I Executive Member, Pi J. Vanlalsawmi, President Kolasib Block-I Mahila President leh Pi MS Dawngkimi, Vice President, Kolasib Block-II ten an tawiawm a ni.
