ASEP-in zirlai naupangte hnenah campaign nei

Planning & Programme Implementation Department bultumin ASEP Gen. Hqrs., Aizawl leh Solomon’s High School chuan Sustainable Development Goals (SDGs) Campaign-na hun Kulikawn YMA Hall-ah an hmang. Sustainable Development Goals (SDGs) hi United Nations programme pawimawh tak a ni a, India pawh UN member zing ami a nih avangin hmalakna hi ngawrh takin a kalpui mek a, Mizoramah pawh Planning & Programme Implementation Department kaltlangin theihtawp chhuaha hmalak mek a ni.
He hun hi ASEP President K. Lalmuansanga chuan a kaihruai a, ASEP Vice President Hmingthansanga leh Solomon’s High School Principal HC Thawnga ten thusawina hun an hmang a, ASEP Campaign Director H. Lalhmunsiama pawhin special item hun hmangin, zirlaite tana fuihna thu tha tak tak zirtirna hun hman a ni.
United Nations Programme pawimawh tak Sustainable Development Goals (SDGs) hian goal 17 a nei a, heng zinga a tam zawk hi environment nena inkungkaih em em anih avangin ASEP chuan theihtawpin campaign a kalpui chho zel dawn a ni. SDGs hian a tum ber chu kum 2030 thlen hma-in kawng tinrenga hmasawnna ngelnghet leh tluantling kan neih theihna tur hmalakna a ni a, chumi hlawhtling ngei tur chuan UN member ramte chuan theihtawp chhuahin ke an pen mek a ni.