Mizoram Cooperative Bank Ltd. in MJA Public Libary-a hman turin Computer full set vawiin khan a pe. Tuikual South-a Mizoram Cooperative Bank Ltd. Head Office-a Computer hlanna inkhawmah hian Apex Bank Chairman, Lalnunsanga chuan, Apex Bank chu Mizo mipuite ta, a hlawkna pawh Mizo mipuite tel a nih thu a sawi a. An Bank kaltlanga sum chevel reng reng Mizoram pawnah chhuak loin, State chhungah vek a virkual avangin an hlutna chu mipuiten hre thar zel se an duh thu a sawi.
Lalnunsanga chuan, Bank ringawt chu an hmalakna a ni lo a, thingtlang-a cheng, Bank awm lohnaah mipuiten hma an sawn theih nan Primary Agriculture Credit Cooperative Society (PACS) an kalpui a, hei hi thingtlang khaw tam takin an chhawr tangkai mek a ni, a ti.
Apex Bank hian tun dinhmunah Mizoram hmun hrang hrangah Branch 28, ATM 34 leh Mobile ATM 2 an nei mek a. Kumin chhungin Branch thar 8 hawn tumin an inruahman mek a, Board of Director term kal mek, kum 5 chhungin Branch 50 neih tlin tumin hma an la bawk a. Sorkar kum liamta 2023-24 chhung khan deposit cheng nuai 1,50,757.54 dawngin, Loan cheng nuai 1,17,212.84 an pechhuak a. Kumin March ni 31 thlenga Deposit an dawn atanga Loan an pekchhuak, CD Ratio chu 77.75% a tling a, Mizorama Bank awm zinga CD Ratio sang ber niin, Sorkar kum liamta chhung khan hlep cheng nuai 4,246.47 an nei a ni.
Apex Bank hotute chuan, Mizoram hmun hrang hrang atangin Bank hawn dilna an dawng nasa a, Branch pakhat hawng turin cheng nuai 25 vel an sen bakah thawktu 3/4 dah nghal a ngaih avangin dilna an dawn reng reng uluk takin an zirchiang a, mipui awm zat te, sum chetvel dan leh Sorkar Department awm dante zirchiangin thutlukna siam thin a ni a, kum 3 chhunga hlep nei hman turin ruahmanna an kalpui thin tih an sawi.
Computer hlanna inkhawmah hian MJA Public Library Sub-Committee Chairman, MJA General Hqrs. Vice President ni bawk, C. Lalhmachhuana pawhin, Apex Bank-in duhsak taka MJA tan Computer an pe chu an lawm hle tih a sawi a. Tunhma atanga Apex Bank leh MJA in thawh hona tha tak an neih chu chhunzawm zel an duh tih a sawi. Inkhawmah hian Apex Bank Vice Chairman, Lalrinchhana bakah Director pathum – B. Lalremliana; Rosiamliana Ralte; R. Lalrempuia leh Chief Executive Officer, A. Lallungmuana leh hotu dangte an tel a ni.