ASEP chuan thuchhuah siamin, “Dawrpui West a cheng ve ṭhin Sanghar (Leopard cat) thihna chungchang ASEP-in a lo hriatin pawi a ti tak zet a. Thihna a tawk a ni tih hriat a nih rual ruala a chhan leh vangte finfiah tura theihtawp chhuahtu DCF Wildlife, Aizawl leh a staff te an fakawmin, an chungah ASEP chuan lawmthu a sawi a ni,” an ti.
ASEP chuan, “Post mortem leh X-ray result aṭanga a lan danin silaimu chu hmuh a ni lo va, a bawp leh dul nemah hliam hlui duk na tak erawh a nei a, a luruh a khi bawk a, hliam neuh neuh pawh a nei nual. A pumpuiah engmah a pai lo va, hliam avanga damlohna neiin hun eng emaw chen a lo awm tawh niin a lang. Wildlife lam hian Police lamah FIR an theh lut bawk a ni.
“Kan chenna khawpui chhung ngeia ramsa lo awm ve ten mihring kutthlakna ni ngeia rin theih vanduaina an tawk leh ṭhin hi ASEP chuan pawi a ti tak zet a, an chungah ngilneihna lantirtu ni turin mipuite kan sawm tak meuh meuh a ni,” an ti bawk.
