Mizoram sawrkar Sports & Youth Services Department, Athletic Federation of India leh Innovations India Pvt. Ltd. te ṭangkawp chuan April ni 26, Inrinni hian Rajiv Gandhi Stadium, Aizawlah, Aizawl International Half Marathon an buatsaih dawn a. He intihsiaknaa tel duh te tan naktuk (April ni 24, zanlai dar 12:00) thleng hian inziahluhna hun hawn a la ni.
Intihsiakna hi hlawm thum a ṭhen a ni a, Half Marathon – km 21.097 a thui te; Open Race – km 10 a thui te bakah Fun Race – km 5 a thui te a awm dawn a ni. Intihsiakna hlawm thum bakah hian naupang kum 10-15 inkar te tan ‘Junior Race’ – km 5 a thui buatsaih a ni bawk ang. Intihsiakna hlawm tinah hian mipa leh hmeichhe tan lawmman ṭha tak tak siam a ni a, cheng nuai 10 sem chhuah a ni dawn a ni.
He intihsiaknaa inziaklut duh te tan website – www.aihm2025.com ah emaw Millenium Centre, Aizawl kawtah offline registration kalpui mek a ni a. India khua leh tui tan cheng 799 chawiin a inziahluh theih a, ramdang mi tan dollar 30 chawi a ngai thung a ni. College leh sikul zirlai te chu an student ID hmangin cheng 99 chauh chawiin an inziaklut thei bawk ang.
Half Marathon (21.1km) darkar thum chhunga thleng te tan Finishers Medal sem chhuah tur a ni dawn a, thlan thleng zawng zawng te hian ni 21 chhungin inziahluhna website aṭangin Certificate an download thei dawn bawk a ni.
He Marathon inmbuatsaihna kal zelah vawiin khan Sports Minister Lalnghinglova Hmar chuan T-Shirt a tlangzarh bawk.
