PC Party thalai chuan thuchhuah siamin, “Aizawl East 1 Constituency vil tura ZPM in an ruat Pu P.L Liandinga’n ZPM Party hotute’n inhnukdawk tura an ngenna avanga Mizopa taka inhnukdawk ta a nih thu amah ngeiin a sawi laia, Nimin June 21,2023 (Nilaini) a ZPM thuchhuah in Pu PL.Liandinga’n ziaka inhnuhdawh a dil avanga East 1 chhuahsan ta anga an sawi leh si hi PC Ṭhalaite chuan mak kan ti takzet.
“Zoram mipuite hian ram hruaitura inhuam Political Party te aṭang hian thu tak leh belhchian dawl kan beisei tawh hle lai a, Party Pakhat aṭanga thu inmil lo, mipuite ti luhai thei lo zi chhuak ṭhin hi PC Ṭhalaite chuan pawi kan ti a; Mipuite tham lohna leh palzutna ah kan ngai a; Pu P.L Liandinga chungchanga thu inkalh awm pawh hi a rang thei ang bera sawifiah turin PC Ṭhalaite chuan ZPM Party kan phût a ni,” tiin an tarlang.