Vawiin khan Vanramchhuangi, Chaltlang Dawrkawn chuan Deputy Commissioner Aizawl District, Aizawl Mizoram hnenah First Information Report theh lutin, Aizawl leh Durtlang kawng chungchanga hmala turin a ngen.
Pi Vanramchhuangi chuan a FIR thehluhah chuan, “Bawngkawn-Durtlang kawng chhak lam, lamlian hrula in hmun atana thuneitu ten ram an pek mimal chuan, nikum lam atanga lei a laih avangin, kumin 2024 fur ruahtui tlak atangin lian tham vak loa lei tla a awm reng a. Ni 29, June, 2024 (inrinni) atangin lian thamin lei a tla a, kawng khar a ngai ta hial a ni.
“Mimal in hmun laih vanga he kawng pawimawh lutuk chhawrtu, Durtlang atanga Vairengte thlenga mipui tam tak nunphung a ti khaihlak nasa em em a. Durtlang khuaa damdawi in leh zirna in hrang hranga thawk te, damlo damdawi in pan leh chhuak te, Durtlang, Selesih, Sihphir leh Lungdai khua atanga lehlanga Aiawla lehkha zir te, mimal leh sawrkara hnathawk te, heng khuaa atanga Aizawla chawhmeh zuar leh nitin inhlawhfaa ei bo bar dapchawpte leh, damlo damdawi in pan ngai mipui sang tel tuarna hi a pawi lutuk a. Pawmzam theih a ni lo.
“He lai Bawngkawn-Durtlang lei min fona hmun leh kham sang lutuk laih hian, fur ruahtui tlak hunah lei min a siam ngei ngei dawn tih hi mimawl ber tan pawh hriat loh theih loh a ni a. Keimah ngei hi tuna min mek chhaka petrol pump tur atana laih nen an laih tantirh atang khan, βLeitan kham chawivel ramngaw mawi leh hlu tak suasam a ni ta. Aizawl khawpui chuap atana khilai ngawa siam tuma thahnemngai taka lo enkawl tawhtu, Forest department leh Aizawl Theological College (ATC) a thawkte rilru natna i tawmpui ang u, ATC tlang chima a chim loh nan i tawngtai ang uβ¦β tia public pressure siam nasa ber ka ni ang a, mipui thlawp pawh ka hlawh hle a ni.
“Ka pu, khilai kham pang ko sang lutuka in hmun atana lei laih khi, furah a min ngei ngei ang tih hre turin geologist nih a ngai lo a. Mi pangngai chuan mihring chhia leh tha hriatna thiang tak hmangin, kan ram leilung dawrawm leh derdep, keh leh sawm sa (fragile) ang maia nghet lo, kham ko sang lutuk laih hi ram leilung leh mihringte tuarna nasa tak thlen thei a nih avangin thil thiang lo a ni. Chu chu an ngaihthah a, chu chu an haider lui a, mipui tam tak pawisakna an neih loh vangin an lai lui a tih loh theih loh! Mipui singtel tak meuhin kan tuar ta ngei a ni. Chuvangin he lei laiha mawhphurtu a hnuaia ka tarlan heng:-
1. In hmun petu/hming sign-tu
2. Lei laih phalna petu,
3. No Objection Certificate (NOC) petu
4. Leilung a him tih certify-tu
5. Lei laitu, lei laia awihpang dawl nghehna lung bang (retaining wall) sa nghal lotu
6. Helai hmun viltu, Technical License Holder hrang hrang
7. Mawhphutu dang awm apiang-
te hi chhui chhuak a, an thiltih sual phu tawka hrem an nih ngei theih nan Dan anga hmanla turin ka ngen a che,” tiin a tarlang.