Laltlanzova Khiangte, Executive Corporator, Chairman, 133th Aizawl Day Organising Committee chuan vawiin khan Aizawl Day hman a nih tur chungchangah chanchinthar lakhawmtute kawmin, “Mizoram khawpui ber Aizawl hi kum 1890, Ni 25 February ah din a ni tih hi Mizoram sorkarin official-a, a pawm dan a ni a. Hemi ni hi Assam Police Officer Dally-a leh a ho mi 400 lo thlen a, Aizawl Fort an din ni a ni. 1990 kumah khan Mizoram Sorkar huaihawtin Centenary ropui takin kan lawm anih kha. Tichuan, Aizawl dincham hi kan hriat zui vak loh hnuah Aizawl Mihlun Thlahte chuan kum 2020 atang khan he ni hi ‘Aizawl Day’ ti a vuahin an hmang chhunzawm leh a. Nikum March ni 11 a Board of Councillor Meeting chuan he ni hi AMC ni pawimawh (highlight day) ah a puang a. Aizawl Day hi kum tin, kumin atang hian a hmang ziah tawh dawn a ni,” a ti.
Laltlanzova Khiante chuan, “Aizawl Day vawi 133-na lo thleng tur hi AMC chuan nasa takin kan urlawk a. He Day lawmna atan hian Budget ah cheng nuai 50 dahin; a thlavenga dah nen a vaiin cheng nuai 60 ruahman a ni a. Kan hotupa, kan Mayor hian a tir phat atangin min tuipui a, thawhpuite ngaihdan ngaichang thiam tak kan nei hi AMC a kan thawhhona pawh Elected Corporator zawng zawng te chuan Aizawl hian hma sawn se, thang zel se tih duhna nei tlangin ro kan rel ho thin a ni. Aizawl Day vawi 133-na lawmna atan hian AMC chuan Organising Committee pui a din a. Chairman atan ruat ka niin; meeting hi tum 3 lai kan thu tawh a; ngaihtuahna kan seng tlang hle a ni. Hma chak zawka lak anih theih nan sub-committee peng hrang hrang hetiang hian siam a ni a. Football Tournament Sub Committee, Cleanliness Competition Sub Committee, Information & Publicity Sub Committee, Band Contest Sub Committee, Carnival Sub Committee, Cultural Sub Committee, Stall & Exhibition Sub Committee, Souvenir & Conclave Sub Committee te an ni a. Anni hian sub committee member theuh te inruatin; an inbuatsaih mek a ni.
“Aizawl Day pual hian Sports a Mizote ngaihlut ber Football Tournament chu AMC leh Aizawl District Football Association te tangdunin; kan buatsaih dawn a. AMC hnuaia Ward 19 te chu an tel thei vek dawn a ni. Football match hi February ni 8 atanga ni 24 chhungin Rajiv Gandhi Stadium, Mualpui ah khelh thin a ni dawn a. Knock Out system hmanga inkhelin; a chak lo zawk zawk chu an tla nghal zel dawn a ni. Player tel tum te chu an khelhna Ward ah vote an nei ngei tur a ni a. Kum la tling lo tan an Local Council Chairman theuh te hriatpuina lehkha neih tur a ni ang. Team khatah player mi 25 leh Official mi 5 zel an awm thei dawn a, MFA Technical Rules hman a ni ang. Match khelh rei zawng hi 45+15+45 minutes a ni ang a. Hun pangngaiah chak zawk an awm lo anih chuan extra time 15+15 minutes pek an ni ang. An la inhnehtawk zel anih chuan penalty shoot out hmanga a chak zawk, a chungnung zawn zel tur a duan a ni bawk. Football Tournament hi chhun en laia khelh thin a ni ang a, final match erawh Ni 24, February zanah khelh a ni dawn a ni. Football match en tur hian mipui te kan sawm che u a, mahni Ward theuh an khelh huna tawiawm turin ward chhunga mipui zawng zawng te kan insawm tak meuh meuh a. Tin, kan ward tana khelte hi duhsakna kan lo lantir thiam pawh ka duh a ni.
“Conclave & Souvenir Sub Committee hmalakna lo thlirzui ila. Ni 23, February hian Aizawl Day Conclave hi pui tham taka buatsaih tum a ni a. He hunah hian Aizawl Chanchin, a lo indin chhoh dan ngaihnawm tak chu zirhona neih a ni dawn a. Conclave hi Aijal Club a R.B McCabe Hall ah neih tum a ni a. Aizawl chhunga tlawmngai pawl tihtham deuh hruaitute, Aizawl Mihlun Thlahte, Central YMA, MHIP, MUP, MZU leh MSU te lamkhawmin; Chanchinbumite leh College leh University-a History & Ethnography department zirlaite nen Aizawl indin chhoh dan hi kan chai ho dawn a ni. Tin, Aizawl Day pual hian Souvenir phek 200 a chhah tihchhuah kan tum a. A chhungah hian article 25 kan nei thei dawn a. Ziaktute pawh hi mi chhuanawm tak tak thlankhawm an ni. Hmanlai Aizawl chanchin chhiar tur a awm dawn laiin; tunhnu Aizawl leh nakin Aizawl thlengin; a kimchang dawn viau a ni. Tin, Aizawl thlalak hlui te hmuh tur a awm dawn bawk a. Chutih lai chuan, AMC in mipui te tana a thawhna chanchin te pawh tarlan tum a ni a. He lehkhabu hi copy 2,000 siam tum a ni a. Souvenir a ni vang vang a, lehkhabu rotling tak ni pha ngei turah kan beisei a. Souvenir hi Conclave neih ni ah a duh apiangte chhiar theih turin tlangzarh a ni dawn bawk a ni.
“Stall & Exhibition Sub Committee hmalakna lo ngaithla ve leh ila. Anni hian February ni 23 atanga ni 25 chhung hian Aizawl Sipai Lammual ah Stall 77 hawn an tum a. Hengte hi thlan fel vek tawh niin; chung zinga stall 27 chu ei leh in lam a ni dawn a. Kan sawi duh chu ei leh in hi a chi hrang a tam dawn a, Indian, Chinese, Korean, Japanese, Thai, Continental leh keimahni Mizo traditional food leh kan chhehvel northeast food a kim vek dawn a. Tin, keimahni tualchhung tharchhuah hrang hrang te pholanin a awm dawn a. Aizawl Day pualin Heng te hi nidanga an phochhuah thin aiin a tlawm vek dawn a. Mizo hnam ziarang ti lang thei lam thuamhnaw te phochhuah a ni dawn a. Tunlai thalaite mit la tur tak an ni dawn tih hrilh ka ni. Keimahni tualchhunga eizawnna a te ber atanga a lian ber thlenga indawmkan leh inchawisan hi AMC chuan a ngaihpawimawh pakhat a ni.
Tin, Photo Exhibition kalpui turah hian hmanlai thlalak atanga tunlai thlalak phochhuah a ni dawn a. Thlalak hlui thenkhat te hi social media ah emaw kan la hmuh ngai loh, thulkhung kan phawrhchhuah tur, kan tana thil thar tur te an ni hlawm dawn a. Aizawl lo danglam chak dan tarlanna a ni ber dawn a, hei hian mipuite a hip hle turah kan ngai bawk a ni.
“Cultural Sub Committee kan nei leh a, anni hian Ni 25, February ah Costume Parade an rawn nei dawn a. Hemi bultum tur hian Republic Veng Branch YMA te an ni dawn a. Anni hian hmanlai Aizawl atanga vawiin Aizawl a kawng hrang hranga hmasawnna thleng leh kan incheina chena a danglam chhoh dan rawn entir an tum a. Tin, AMC in khawpui hmasawn nana hna a thawh dan lamhawi mipuite hnena hriattir an rawn tum bawk a. Thlir a manhla dawn hle a ni.
“Band Contest Sub Committee te hian rimawi lam an hrut dawn a. Aizawl Day ni takah, Aizawl Sipai Lammualah Band Contest hi neih tura ruahman a ni. Lawmman 1-na chuan ₹1,00,000/- a dawng dawn a, 2-na in ₹70,000/- leh 3-na in ₹50,000/- an dawng dawn a ni. Consolation prize atan band group 2 tan ₹10,000/- ve ve an dawng ang. Band contest a tel tum te chuan ni 11, February hma ngeiin 9862519779 ah hian telegram kaltlangin Demo Live Video pakhat thehluh tur a ni a. Hla 3 tal intihsiakna ah hian an rawn nei tur a ni. Band contest a tel tur te chuan AMC Ward chhungah vote an nei ngei tur a ni a. Kumtlinglo tan chuan Local Council hriatpuina lehkha neih tur a ni ang. Tin, Aizawl Day puala Band Contest ah hian Band mi la hriat hlawh loh te dawmkan hi a tum anih avangin; Band lar sa leh hlun tan tel a remchang dawn lo thung a ni. Band Contest ah hian thalaite a tam thei ang ber rawn tel turin kan sawm a. A hmunah pawh rawn en theuh turin mipuite kan sawm a ni.
“Cleanliness Competition Sub Committee kan nei bawk a. Anni hian Aizawl Day pualin veng fai an endik dawn a. February ni 8 atanga ni 16 chhung hian AMC area chhung faina endik hna hi Aizawl City Local Council hruaituten an bultum dawn a ni. Veng fai thlanchhuahte chu Aizawl Day ah lawmman hlan an ni dawn a. Lawmman 1-na in ₹50,000/- a keng ang a, 2-na leh 3-na in ₹30,000/- leh ₹20,000/- a keng ang. Consolation prize veng 5 thlanchhuah hnenah ₹5,000/- theuh hlan an ni ang. Tin, Aizawl Day lo thleng tur pual hian Aizawla cheng zawng zawng te mahni in leh a vel lo tifai theuh turin ka ngen a. A remchang anih chuan Local Council tinin February thla chhung hian mahni veng theuh ah faina hnatlang lo ko turin kan inngen bawk a ni. Aizawl khawpui hian faina kawngah hma kan sawn zel tih a lang a. A lawmawm takzet a ni.
“Carnival leh Cosplay sub committee te hmalakna han sawi leh ila. Anni hian Aizawl Day Lammual a lawm chhung zawng Cosplay show an buatsaih dawn a. Cosplay ti tur hian helama tawnhriat neitha, LAUGH TALE biakfel an ni tawh a, mipui te tihlim tur leh chawkphur turin an inlan dawn a, inelna siam tum niin; lawmman that ak an buatsaih ang.. Tunlai hian naupang ten face painting an lawm hle tih ka lo hria a, face painting hi tih tum a ni bawk a. Naupang a tam thei ang ber lo hruai turin kan inngen nise.
“Carnival hi buatsaih tum a ni bawk a. Tunah hian Carnival neihna tur hmun hi la tihchian theih a ni rih lova; amaherawhchu Carnival pui tak neih erawh kan tum a ni tih chu kan sawi duh a, Carnival ah hian naupang atanga puitling lawm tur thil tam tak infiamna kan chhawpchhuak dawn a. Mipuite lo kal vek turin kan sawm a ni.
10.Information & Publicity sub committee te hi a phur ber an niin ka hria a. Hma pawh an la chak viau a ni. Anni hian Aizawl Day puanzarna leh vantlang hriattirna kawngah social media platform Instagram, Facebook leh Whatsapp piahlamah cable tv channel LPS leh Zonet te hman tangkai an tum a. AIR lamah pawh puanchhuah thin a ni bawk ang. Tin, Aizawl Veng 15 thlanchhuahah Aizawl Day Chibai bukna an tar dawn a. Aizawl veng lunlai 3 ah hoardings 3 an tar dawn bawk a. Aizawl Day lawmna Gate pui hi Dawrpui a V. Thanga Street tawntirah leh Zodin Square ah te siam an tum bawk a. Aizawl Day ah hian mipui a tam thei ang ber lo tel se tih hi kan duhsam ber a ni. Tin, Aizawl Day pual hian car flag 5,000 siam tum a ni a. Hei hi lirthei a tar tur a ni ang. Tin, Aizawl Day pual pamphlet copy 10,000 siamin Aizawl Day chungchang leh AMC hmalakna mipui hnena puanzarna an nei dawn bawk a ni. Bazar Bungkawn atanga Zodin Square inkarah hian Aizawl Day puanzarna Flag lian 50 tar a ni dawn bawk a, Ni 22 February hian khawlaiah Aizawl Day hriattirna an tlangau bawk ang. Hetianga kan tih hlawhtlin theih chuan Aizawl Day thawm hian mipui hnen a thleng phak ngei ang tih kan beisei,” a ti bawk.
