Vawiin ni September ni 28, 2022 (Nilaini) hian Lal Thanhawla Auditorium-ah Aizawl City Block Mahila Conference cum Political Training Programme neih a ni a. MPCC President Lalsawta leh Zodintluanga, MPCC Treasurer ten thu sawiin, Vanlalawmpuii Chawngthu, President, Mizoram Pradesh Mahila Congress Committee in inkhawm a kaihruai a ni.
MPCC President Lalsawta chuan, “Kum 2023 inthlanpui hi keini Congress Party tan mai ni lovin Mizoram tân ram anga kan chhiat hlen theihna emaw kan din chhuah lehna emaw a nih dawn avangin theihtawp chhuaha tan lak a ngai a ni a ti a. Kan ram sum leh pai dik lo taka chhekkhawltuten vawiin apangin an sum hman tangkai an tum tih kan hria. Party thenkhat te’n votes (mihring) leiin an sum chu an lungmuanpui a. Keini Congress Party te chuan hei hi kan duh lo, sum hmanga rawn lei tumtu che an awm a nih pawhin an pawisa lo lak sak suh u, an pawisa kan laksakte hnena rinawm loh hi kan duh loh avangin khawngaih taka in vote lei tum an rawn kal a nih pawhin ‘keini chu lei theih kan ni lo’, tiin lo ti zak rawh u,” tiin kalkhawmte a chah a ni.
Pu Lalsawta chuan Mizoram hmun tina kan Congress hruaitu zawng zawng leh Congress mipuite hnenah ngenna siamin, “Candidate tura kan beiseite leh kan hotute lakah i insum ang u. A theih hram phei chuan inthlan kaihhnawih thilah hian keimahni lamin senso mamawh hi lo phuhruk theih i tum zawk ang u. Pathian chakna aia sum chakna ringtute ai chuan Congress mipui chu kan danglam ngam tur a ni”. Party Worker te chu Politician an nih thu sawiin Politician chu ram chhiatna veng tur, ramthatna tura theihtawp chhuaha thawktu tur kan ni, a ti bawk.
MPCC Treasurer Pu Zodintluanga, CLP Leader ni bawk pawhin thusawiin party thenkhatten kan ramah hmasawnna a awm lo titen an sawi thin a. Nimahsela, Congress Sorkar khan nasa takin he ram tan kan theihna kan hlan a. Kan ram tana rotling zawng zawng hi Congress hnathawk vek a ni. Medical College nei turin theihtawpin kan sual a, MIMER tiin a hming kan vuah a, a ti thuanawptu ten ZMC tiin an thlak a. Tunah ZMC tia a hming an thlak phei chu Central Sorkarah an zuar leh mek tawh a ni. Aizawl Bazarpui sakna tur pawisa Congress in kan dah sa vek tawh chu tun thlengin an la sa tha duh lo bawk, a ti.
CLP Leader Pu Zodintluanga chuan, MNF Sorkar hnuaia Zoram mipuiten Congress Party Sorkar an ngai thar hle a. 2023 ah pawh Sorkar turin min beisei leh thup tawh a ni. Congress Party a thawhchhuah lehna tur atan Pu Zoramthanga hi a tha em a, hetiang mi hi i nei ve lo ang u. ZPM te hi Party mipui nei tlem ber an ni chungin an hotute inngeih lohna hian mipui a hip thei lova. PC Party phei chu ZPM atang an chhuak tawh a. Tih tham an awm tawh lo a ni, a ti bawk.