February 28, 2025 (Zirtawpni) hian Mizoram Pradesh Congress Committee chuan Congress Bhavan, Aizawl-ah Friday Political Session an hmang a. MPCC president Lal Thanzara chuan thu a sawi.
MPCC President chuan, “Airport chungchang hi sawi pawh tul tawh lova ka ngaih a nia. Mahse, sawi a tul tlatna chhan chu Mizorama rorelna sang ber Assembly House-ah Chief Minister adviser in thu a sawi dan kha a mak ka ti tlat a. CM adviser meuh chuan a hre lo niin ka ring lo va, a hre lo der nge ni.
“Kum 2012 khan Airport sirah hmun hnihah blast pen Air Force te hman turin ram acre 32.66 kum 50 atan cheng khat chauhin an hralh a ni. A hralh tu chu chu Congress a ni tih kha kan ngaithla awm e. CM adviser meuh ni si hian hralh leh hawh (sold leh leasing) hi a hre hrang lo emaw ni chu aw ka ti.
“Hun eng emaw chhung atana pawisa chawia inhawhtir a ni. Chu pawh sum duh vanga tih pawh a ni lo, kan mamawh lem lo a hmingin cheng khat chawi hian lo nei ru kan va ti pawh a ni lo. Ram venhimna atana pawimawh an tih vangin Air Vice Marshal in lehkha a Mizoram sorkar lo dila indo thutah pawh Jet fighter te pawh lo kal ngai se la, thuhruk theihna tur hmun min siam sak rawh u an ti a ni.
“Ram hnukhkhawih a ni a, India ram pumpui himna tur atana duh innei a nih chuan tiin hmun an lo pe a ni. Aviation hotu ten an duhthu a hmun an pek mai theih a ni lo va, airport license min petu te hnenah phalna te min pek a ngai a. Chutiang phalna chu lo buaipui teh u tiin kha tihlaia kan hotute khan an ziak nghe nghe a ni.
“Phalna an pek hnuah leh lo buaipui rawh u an tih pawha an buaipui tak lohah kum eng emaw ti chhung hun a kal hnuah MNF sorkar lai khan kan inhawhtirna kha tihtawp a ni ta a ni.
“House zahawm takah Congress in kumkhatah cheng khat khat lekin kum 50 atan a hralh han tih bawng bawngna chi a ni lo. Kan thil hriatchian reng a leila zawnga kan sawi duh talh zel dawn chuan ZPM hian Pathian ram an thlentir lovang tih ka hlau khawp mai.
“IAF in an ngaihsak zui lova, MNF hun laiin inhlanna tihtawp a ni. Airport chungchangah chuan kan hrefiah thiam tawh maiin ka ring a, a hawha inhawh tir a ni. Kan thil phal vang pawh a ni lo, ram venhimna atana India ram pumpui himna a tana Air Force te ngenna kha an lo ngaihsak a ni. Mawlh hralh a ni lo, mawl hralh niawm taka min chhuah kha a tlawmthlaka, kum sawm nga atan cheng khatin an hralh han intih kha a politician thlak nge politician loh thlak pawh ka hre lo.
“Sawhthing in lei chungchangah hian a chhia a nih pawhin a tha a nih pawhin sorkar hian mawhphurhna an lak mai loh le. Matric ton sawm kan hralh lei an tia, an puangzar nasa em em a. Sailam leh Chamring in a khaw pumin an hmingchhiat phaha a pawiin a vanduaithlak a ni. Export leh Import chungchangah hian exporter chuan grower te hnen atangin a duh kha a dil ang a, anni’n an neih ang ang chhungkhawmin exporter chuan importer hnenah khan a hralh mai tur a ni. A lo tha tawk lo a nih chuan, a tha tawk lo a thliar ang a, a tha tawk a dah hrang ang a, a silfai ngai a silfai ang a, a leitu tur ten an duh tur ang ngeiin a sawngbawl tur a ni.
“Chamring leh Sailam khua te hnenah sawhthing kan lei duh e an tia, society kaltlangin an lo pe a, a va chhe ve an lo tihsak a. Sailam leh Chamring khua mipui te tana zahthlak awm khawpin House zahawm takah leh Minister zahawm tak ten an sawi chiam chiam a, a vanduaithlak takzet a ni. Kuthnathawk tute hmuhsitna a ni a, Reliance te hnenah an hralh duh a nih chuan an duh tur ang ngeia cheibawl chu a hralhtute mawhphurhna, sorkar mawhphurhna a ni.
“Congress chuan NLUP hmangin chhungkua nuai khat sing li chuang hnenah tanpuina a pe a, mi tam takin eizawnnaah hlawhtlinna an neih theihphah a ni. Mizoram kuthnathawktute hriat atana ka sawi duh chu Congress kan sorkar leh a nih chuan NLUP changtlung zawka hma la in kan kalpui ang. Kan sawhthing chingtute leh kuthnathawk te hi kan VIP in ni leh dawn a ni.
“MNF president in tun hnaiah khawchhak lam a fang a ni awm e, Mizo hnam hminga politics khel thin kha an han sorkar khan hming lar ber chu vai hming Kamrula a ni. MNF president chuan Pathian leh kan ram tana din a nih avangin an party ngheh thu a sawi a, Pathian leh kan ram tana dinte hian NEDA platform hnuaiah BJP tantu niin an thu ve kuk a nih kha.
“MNF hi martar te thisena lei an ti fo va, an sorkar in martar te an sawi ngai lo va, an sorkar loh laiin martar te an sawi leh a, an sorkar veleh an ngaihsak leh lo va.
“MNF president in lo hria se ka duh chu MPCC innghahna hi Central Congress a ni lo, chunglam a ni tih lo hria se. MNF President hian Vairengte a pelh rual rualin India rama Congress tam zia a hmu zel ang, a kal thui poh leh a hmu tam zel dawn a ni. Chutianga sawi ral mai mai chi kan ni lo,” a ti.
