October 15, 2022(sat) zana Daniel Sailo MCS-in Upa B.Zalawma (Ex-President Dampa Group YMA), ama in chhung ngeiah kal chilha tawngkam mawilo tak taka a ankhum leh kut hial a thlak chungchangah Dampa Group YMA leh Tuikual Local Council leh NGO te chuan a hrana thuchhuah siamin, an dem tak zet thu an tarllang.
Dampa Group YMAO chuan, “October 15, 2022(sat) zana Daniel Sailo MCS-in Upa B.Zalawma (Ex-President Dampa Group YMA), ama in chhung ngeiah kal chilha tawngkam mawilo tak taka a ankhum leh kut hial a thlak hi Dampa Group YMA chuan zahpuiawm kan tiin kan dem takzet a. Hetiang MCS Officer chapo, thingtlang mite min hmusittu, aia upa zahna chang hre lo leh nunphung hre miah lo hi a chhawrtu Sorkar hian na takin hrem rawh se.
“Upa B.Zalawma hi W.phaileng khaw chhuak niin tunah Aizawl Tuikual N ah in leh lo neiin a inbengbel tawh a, zirtirtu pension, a vanglai hun zawng zawng ram leh hnam, khawtlang leh Kohhran tana inhmang zo a ni a. YMA hruaitu hlun, W.Phaileng Branch leh Dampa Group YMA tana sulhnu tam tak min hnutchhiahtu a ni a. A chunga hetiang a lo thleng hi kan thinrim takzet a ni.
“He Officer chapo tak erawh hi chu, a hmuhsit em em thingtlang lamah chuan a hmel kan hmu duh tawh lo va, Dampa Group YMA huamchhung hi rawn dai tawh lo turin kan hriattir nghal bawk e,” tiin an tarlang.
Tuikual North Local Council leh All NGO te chuan, “Ni. 15.10.2022 (Inrinni) zana kan veng, Tuikual North, Section – II a awm, Upa B Zalawma chunga kutthlakna thleng hi keini Tuikual North Local Council leh All NGO te chuan pawi kan ti em em a. Kutthlaktu hi *Daniel Sailo*, s/o Lalsailova Sailo, Ramhlun Vengchhak (Ramhlun Venglai Branch) House No-A 81, MCS 2014 Batch, Under Secretary, Finance & DM&R ni a hriat a ni a. Hetianga ama inchhung ngeia a pa rual hmusit taka a tawngkhum leh rawng taka kut a thlak hi kan dem tak zet a ni.
“Mizo hnam nuna aia upa zah leh tlawmngaihna nun hre lo, mahni pa te rual pawh kutthlak hreh lo hi kan khawtlang tan a him lo hle in kan hria a, kan veng leilung rawn rap tawh lo turin kan duh a ni. Tin, hetiang mize zahpuiawm tak nei Officer hi sorkarah nihna pawimawh nei tlakah kan ngai lova, a na thei ang berin sorkarin a chungah action la se tih hi kan duhdan a ni e,” tiin an tarlang ve bawk.
