Aizawl District Congress Committee (ADCC) chuan, “Nikum lamah sorkar in sum inrenchem nasa taka kalpui tur a ni tia sawiin Year of Consolidation a puang a. Mizoram mipuite eibel ber ration buhfai man te pawh tihto a ni a. Chutiang a nih mek lai chuan Food, Civil Supplies and Consumer Affairs (FCS&CA), Govt. of Mizoram-in March ni 7, 2024 khan buhfai (Grade A Rice) supply tur Limited Tender Notice No.D.3.1015/1/2022-DTE(SPY)GEN a chhuahnaah a chhang hniam ber ni lo thlan a ni,” an ti a.
ADCC chuan, “Sorkar in Tender a chhuahnaah a chhang hniam ber K. Zabuanga (RL Store, Ngaizel, Kulikawn) chhanna Rs. 3400.50 per quintal aiin LZ Juice, Melthum chhanna Rs. 149.50 per quintal a sang zawk chu thlan a ni.
“LZ Juice (Rs. 3550/Quintal) a chhangtu te hnenah pek a nih hian Quintal khatah Mipui Sum (Public Exchequer) Rs. 149.50 zel Sawrkarin a hloh a ni. Sawrkar sum hloh hi a tam tham hle a, a uiawm tham hle a ni.
“Hetia a chhang hniam ber ni lo supplier ni tura thlan a nih avang hian induhsakna uchuak tak a awm ngei niin a lang a, sawrkarin sum tam tak a hlohnaah hian hlawkna uchuak tak tel tu leh, eirukna (corruption) thuk tak a inzeh ngei kan rin avangin Lokayukta-ah hian chhuichiang turin kan thlen a ni,” an ti bawk.
