Vawiin Dt 29.6.2024 Inrinni hian Aizawl District Congress Commitee chuan Pu Zabiaka Farm, Maubawk ah infuihtharna hun an hmang a, he hunah huan ADCC President Lalhmingthanga Pachuau chuan thusawiin, “Hnehna hlut zia te, chakna hlut zia te, engvangin nge kan chak ang tih te hi politic ah chuan a pawimawh em em a. Chethona hi hlawhtlinna, thawhhona chu chakna ani tih Abraham Lincoln a khan a lo sawi tawh a. Greek Plato-a chuan Politic a inrawlh duhlo mifingte avangin mi a te rorelna a thleng thin a ti a. Politic-ah kan inhmang a, hei hi kan hmalam hun atan leh ram tan a pawimawh a ni.
“Congress party a kan rawngbawlna hian chakna min thlen se ka duh a ni. Party in enge min tihsak ang tih nilovin, party tan enge ka tih ang tih kan ngaihtuah a, tan kan lak a ngai a ni. Huaisem taka chona kan hmachhawn phawt chuan chakna kan chang anga, hlawhtlinna kan chang dawn a ni. Vawiina kan chanvo kan inpek te hi chona ani a, engtin nge kan hmachhawn ang tih chu kan hnathawh ah a lang dawn a ni. A dik leh a tha zawk ni a kan hriatah chuan huaisen takin i kal ang u.
“Lungrualna leh thawhhona tha hnuaia hmalakna hi chakna ani tih kan hriat a ngai a. Hun hi a hlu em em a, kan hun hlu tak hi hmang dik ila, i hmang duhdah lovang u. Kei leh ka chhungte, khawtlang tan leh ram tan engtin nge ka hun ka hman tih i ngaihtuah thin ang u. Napoleana chuan Austria ho a hneh dan an zawh in, ‘Minute nga hlutzia an hriat loh vang a ni’ a ti a, i hre reng ang u.
“Mimal ang pawn kan hmabak te i ti zel ang u, i luhchilh ila, hlau lovin i kal zel ang u. Kan huaisen tur a ni a, kan huaisen chhan pawh a dik tur a ni.
“Ro kan relsak mipuiten an rin ngamloh thiltihtheihna neih hi a hlauhawm a ni. Tuna kan ram dinhmun hi kan ngaihtuah a ngai a, kan rorelsak tur mipuite rinngam loh kan nih chuan a pawi hle dawn a ni. Vawiin ni a kan in tuaitharna programe te hi inngaihtuah harh nan hmang ila, mite chetchhiat vanga tho chhuak tur ni lovin keimahni hi kan chechhuak tur ani a, kan thawkchhuah tur a ni. Chu chu chu party pawhin kan thatpui dawn ani.” a ti.
He huna thusawitu Pu Lalroenga, General Secretary, MPCC i/c ADCC pawhin thusawiin, “Tunhnai inthlanah kan beisei kan phak lo tih kan hria a, engtin nge kan chak leh theih ang tih ka ngaihtuah thin a. Hnathawh loh hi chuan chak a har hle a ni. Keimahni hi chapo lo ila, hotute thurel hi pawm thiam ila, kan dingchhuak leh ang. Keimahni pawh kan hmalakna turah kan huaisen a ngai a ani. Zam lovin i kal zel ang u” a ti.
He intuaitharna programe hi Pu C. Vanlalruata, Vice President, ADCC chuan a kaihruai a, Pu Lalchhuanliana, Secretary chuan hunserh a hmang a, Pu Vanhnuaithanga, General Secretary i/c GAD chuan introduction a pe a ni. Pu Vanlalhmangaihzela, Vice President chuan thusawina hun a hman bakah Pu F. Lalhmingmawia, Treasurer chuan Vote of Thanks a sawi bawk a ni.