Vawiin ni 12.03.2025 (Nilaini)- hian Aizawl District Congress Commitee kaihhruai in Pu Ngunlianchunga, MLA thlavang hauhna leh Assembly zahawmna humhimna atan Assembly House bulah an pungkhawm a, mi thahnem tak an tel a ni.
He hunah hian Pu TT Zothansanga chuan thu sawiin, “He hmuna kan lo kal chhan hi a lungchhiatthlak kan ti a, Mizoram rorelna sangah kan ram humhimtu tura kan lo ngaih leh kan nu leh pa ber kan CM Pu Lalduhoma’n a memberpui te zah baksak lova thil a sawina avangin Zoram rorelna hmun hi a zahawmna a tlahniam zel dawn niin kan hria, a member puite chunga a rilru put hmang te kan en in tunah hian Pu Ngunlianchunga mai ni lo, Opposition member tam tak te thlavang hauh turin he laiah kan lo kal a ni.
“Nimin piah lawk kan Assembly ah khan kan Chief Minister zahawm takin zawhna a chhan dan chungchangah keini hi kan dam thei lova, vawiin ni a kan lo punkhawm chhan hi LADC ah Pu V. Zirsanga chungchang zawhna avanga lo piang chhuak niin, Pu Ngurdingliana’n Pu V. Zirsanga case dang a neih a zawta, a zawhna chhan ta lo chuan a zawttu lam CM hian a beih let ta vak maia, kha kha a unparliamentarian khawp mai a, khatiang kha thleng tawh lo se kan duh.
“Pu V. Zirsanga hi Pu HT Lalrinchhana’n ni 19, Feb, 2024 khan kum 4 tan tur leh cheng nuai 4 chawi turin a convict a, ZPM Thalai Lai District Headquarters lamin Press Release a corruption thubuai nei CEM atan an duh loh thu an chhuah hnan tawh a nih bakah ZPM Manifesto kan en chuan Administrative Reforms ah chuan ‘eiruk ti bo turin nasa taka hmalak a ni anga, Lokayukta pawh hna thawk thei tura tih chantlun a ni ang tih a nih laiin LADC lamah convict tawh hnu puan ang an pawm leh na te, an PR te en let hian zak hle tur an ni a, Pu Ngunlianchunga hnenah leh House hnenah leh Zoram mipui hnenah hian ngaihdam dil a ba niin kan hria a. Chuvangin helai ah hian Chief Minister hian ngaihdam dil ngei se tiin Pu TT. Zothansangan, General Secretary, MPCC a sawi a ni.
He hunah hian Dr.Lallianchhunga, MPCC Spokesperson pawhin thusawiin, “House chhunga Pu C.Ngunlianchunga zawhna pehhel taka chhan a tumna a House Leader Pu Lalduhoma m awngkam hman dengkhawng tak mai leh, sorkar thachakna hmachhuana invauna rawngkai a chhakchhuak kha India ram chhung leh Commonwealth ram hrang hranga Dan Siamna In (Legislature) ah ‘Unparliamentary Language’ anga ngaih a ni a; hemi chungchang ziahna hi Mizoram Legislative Assembly Website-ah pawh dah a ni a. ZPM te hian House chhunga awmdan mawi leh dik hre turin Research an lo la ti lo tih a chiang hle. Eptu party member te thusawi laia an m hutna atanga ZPM MLA ten an lo hnial leh vak m hin dan atang hian ZPM te hian Assembly House chhunga awmdan mawi an zir nasat a ngai hlein ka hria. House Leader, Pu Lalduhoma pawh a patling tawk lo ka ti bawk.
“Hun kal tawh, kan hmuh phak ve chinah pawh House Leader Pu Lal Thanhawla leh Pu Zoramthanga te khan Patling takin thu an sawi mai thin a. Pu Lalduhoma hi chu a Minister te chhan tur zawhna reng rengah lo inrawlh ve vek a tum emaw tih tur a ni a, a Minister te chhanna hi a duhkhawp lo hle tihna a ni thei bawk. Congress hi Pathian zarah leh mipui te duhsakna a kan lo sorkar leh thei a nih chuan ZPM TE ANG MAI MAI HI KAN NI VE LOVANG” a ti.
He hun hi Pu Lalhmingthanga, President, ADCC kaihhruaina a neih a ni.
Punkhawmnaah hian Police lam nen tlem innawrin Congress Thalai hruaitu pahnih chuan hliam an tuar a, Aizawl Hospital-ah hruai niin MPCC President Lal Thanzara leh Ngunlianchunga, MLA ten an tlawh nghal a ni.
