Mizoram People Forum (MPF) chuan vawiin November 7, 2004 hian Vanapa Hall-ah Annual General Conference vawi 17 na an hmang a, Hun khatna hi Rev. Vanlalnghaka, MPF President chuan a kaihhruai a, Rev. Jessai L. Naitham, Jt Secretary chuan hunserh a hmang a, Roneihthanga, Secretary chuan Thupuan leh inhmelhriattirna a nei a, General Secretary, Finance Secretary leh Treasure te chuan report an pe a, Pu Lalhmangchhuana, Vice President chuan thu a sawi a, MPF hnathawh thlir letna leh hmalam thlirna hun a hmang.
Hun hnihna hi Rev. Zionavara Fanchun Vice President chuan a kaihruai a, ‘A chhe lai siam that’ tih thupui hmangin MPF President hlui Rev. Lalzuithanga chuan thu a sawi a, F. Lalramlianin, Jt Secretary chuan lawmthusawina neiin Bishop Stephen Rotluanga, Adviser chuan malsawmna in a tin a ni.
Hun hnihnaa thusawitu MPF President hlui Rev. Lalzuithanga chuan, “MPF Hmalakna avangin kan inthlan boruak leh candidate ruat chungchangah chuan kan tha thawkhat viauin a lang a, a lang lo lam chanchin erawh chu a la lungawi thlak chuang lutuk lo niin a hriat. Sum leh pai hmanga vote zawn, inlei leh inhralh te, engemaw thil intiam angte sawi a ni thin. Heng thilah hian kan politician te leh candidate te aimahin mipui lam hian kan tidiklo zawk nite pawhin sawi a ni thin.”
“Candidate te leh an campaigner te atanga engemaw therhlo beiseiin kan lo hmachhawn a, ‘min pek loh chuan’ emaw ‘min tihsak dawn chuan’ titein kan lo hmachhawn thinte hi siam that kan ngaihzia tilangtu a ni. Siamthat a nih lohva tun ang zela kan kal chuan kan ramah hian tun aia nasa zawk harsatna hrang hrang – dan pawisak lohnate, hlemhletnate, tualthahnate, tharum thawnate leh rethei leh hausa karte a zau zel ang a, Kohhran nun pawh a tha lo zawngin nasa takin a nghawng zel dawn a ni,” a ti.
Synod Moderator hlui chuan zawhna hrang hrang zawtin, “Kohhrante pawh hian inenfiah, insiamthatna tur kan nei lo maw? Kohhran member neih tam duhna avang hian sualte hi kan pawmzamin, dik vak lote pawh hi kan chulmam mai lo maw? Fak hla siamtuin a tih angin ‘I kiangah thimah mi an thi, Thlanah thlamuanna nei lovin,’ a tih lai hian Biak In tha leh a chhung bungraw inneih changkan siam lamah te hian kan rilru leh theihna te kan seng nasa zawk lo maw?”
“Kan khawpui, Aizawl chauh ni lovin, thingtlang kilkhawr tak takah pawh tleirawl atanga puitling thleng zu leh ruihtheih thilin a tihbuai sawi tur a tam hle. Kohhran inkhawmte pawh a member atanga chhut chuan khawi Kohhran mah hi inkhawm kan tha lo. Hetiang zela kan kal anih chuan khawthlang ramte ang mai khuan inkhawm tur pawh hi kan awm lo mai ang tih pawh a hlauhawm lo maw? Chuvangin, kan chhiatna lai leh tlakbalna lai siam that tur hi tam tak a awm thei ang,” a ti bawk.
Rev. Lalzuithanga chuan ram siamthat hna thawk tur hian Chhungkua, Politics leh Kohhran a pawimawh thu a sawi a, ram leh hnam siamtha turin inrelbawlna tha (Good Governance) chu ram mamawh a nih thu a sawi. He thupui ‘A chhe lai siam that’ tih hmang hian sawihona neih a ni bawk.
