Dated Hnahthial, 16th August, 2024 ; Vawiin Dt 16.August. 2024 hian Pu K Sapdanga Home Minister chuan Hnahthial leh Lawngtlaiah hmun pawimawh hrang hrangte a tlawhin thusawina hun a hmang.
Home Minister hian Lawngtlai Police Station leh 3rd IR Batallion Headquarter, Thingkah te tlawhin thu a sawi a, “Tun hma chuan kan Mizoram Police te hi India rama Police tha ber, thil chhuichhuah kawnga chhuanawm kan lo tih thin in ni a, engtik emaw lai atang khan mipuiten kan police chhuanawm tak takte kan hmuh dan hi a dang ta deuh niin a langa, tan kan lak vat angai niin ka hria. Sorkar tharah chuan ‘India ramah Mizoram Police an tha ber’, kan tih leh theihna turin kan puan vente sawichhinga tan la thar leh turin ka beisei che u a ni. ZPM kan sorkar atangin tih tak zetin Police dinhmunte kan han zir ve a, Police indaih lohna te a tamin hmunhma te pawh lo tla bal a tam tawh hle a, kan sorkar chhung a la rei lova, a theih ang angin thawm that hna kan thawk nghal a, a pawp lai kan hnawhphui zel dawn a ni. Kan awmna hmun chungchangah chan chhe lai bik a awm chuang lova, hmun hla deuh inhremna anga kan ngai te hi a tha lo, sorkar hnathawk chu che reng kan ni tih hriain tumah vanneia vanduai bik kan awm lo tih hre thar leh ang u”, a ti bawk.
Minister chuan, “Kan ram hi tihchhiat belh tlak a awm tawh lova, eiruk dona kawngah sorkar thar kan tang chho hle a, sum leh pai chauh ni lo, kan hun hman dan nen lam hian eiruk theih a ni a, sorkar hnathawk inthlahdah tak te hian eiruk bul kan tan a, sum leh pai duhamnah kan lut fo thin. Chuvangin mahni invenna chang i hria ang u, Kalphung thar ah kan lut ta bawk a, tute mah inthlahdah a thiang lo, Sorkar tharah chuan a chhe lai siamtha tu lo ni ang che u”, a ti bawk.
Pu K Sapdanga hian Lawngtlai khawpui chhunga kum 1995 atanga lei min/tla hniam thin leh KMTTP road min nasa tak te chu a hmunah a en a, a theih anga harsatnate chin fel chhoh zel a tum thu a sawi bawk.
Home Minister hian chawhnu lamah Hnahthialah mipuite tan amah dawr theihna hun siamin Hnahthial leh a chhehvel khua thahnemtakin Minister hi an dawr a ni.