ZPM Thalai chuan thuchhuah siamin, “Mizoram sawrkarin RTI zawhna a chhanna aṭangin Zokhawsâng-a Assam Rifles-te an insawn luhna tura Mizoram sawrkarin a tih tur ang ang a tih zawk vek tawh thu târlan a ni a, LMC inthlan dawna Land Revenue & Settlement minister Pu Lalruatkima’n Assam Rifles-te chu a battalion pum huapa an atta nuaina leh kelsa kanna bêl nen lama Zokhawsânga insuan ang a mipui hmaa a sawi hnuah, vawiin thlenga Zokhawsâng-a an la insawn lut lo hi ZPM Ṭhalai chuan a hrethiam lova, Aizawl khawpui aṭanga Assam Rifles sawn chhuah hi MNF sawrkâr hian politics khelhna atân chauh em ni a hman? tih hi kan zawhna a ni.
“Asaam Rifles thuneitute hnen aṭanga ZPM Ṭhalai-in thu a dawn danin, Mizoram sawrkârin Zokhawsâng Assam Rifles Complex-a a hnathawh chu a chhiat thu dawn a ni a; hengte hi Mizoram sawrkârin sawifiah a, building luah tlâk lohte pawh a awm tak tak em? tih sawifiah ngei turin MNF sawrkar kan phut.
“MNF minister leh party hruaitu hraw tak takin LMC inthlan laia Assam Rifles-te Zokhawsâng-a insawn lut tawh ang a an sawi hi mipuite zah lohna lian takah ZPM Ṭhalai chuan a ngai a, MNF-in politics-ah pawisak an neih lohzia tilang chiangtu-ah kan ngai a, MNF party hian an tlin duh luatah dawt politics an hmatheh hreh lo a ni tih lo hre lawk turin ZPM Ṭhalai chuan Zoram mipuite a chah a ni. Tun hnuah hetiang a lemchanna ‘drama politics’ hi bansan tawh turin MNF party kan ngen a ni,” tiin a tarlang.
