Aizawl, 20th March, 2023: Vawiin khan ZPM chhung inkhawm neih a ni a; Er. Vanlalneiha Ralte, General Secretary chuan kaihhruaiin Lalliansawta, President chuan mi thar lawmlutin thu a sawi a. Lawmluh zingah hian zaithiam lar Vanlalsailova pawh a tel a ni.
Lalliansawta chuan, “Vawiinah mi thar duhawm tak tak lawmluh tur kan nei leh hi a lawmawm hle a, ZPM hi sawrkar thar siam turin a inbuatsaih mek zel a, a phurawm hle a ni. Lunglei Municipal Council (LMC) inthlan lo awm turah nasa takin hma kan la a, candidate tha tak tak kan nei a, hnehna kan chan theihna turin Lunglei lama kan hruaitute leh Aizawl lam atanga kan hruaitute pawhin nasa takin an bei mek a, kan theihna zawn apianga tan la turin kan insawm a ni. Keini party hian sum leh pai hmachhuan tur kan nei lo va, thawhrimna leh inpekna hi kan hmachhuan leh innghahna a ni,” a ti.
ZPM President chuan, “Kan ram dinhmun hi ngun taka kan thlir chuan ram leilung tha, engkim that duh em em na hmun a ni chungin vawiin thleng hian engahmah intodelhna nei lovin kan la awm mek a ni. Party sawrkar, mi tlemte hamthatna sawrkar kan lo din tawh thin avangin ZPM chuan kalphung thar mipui sawrkar din ngei kan tum dawn a ni. A tha lo leh dik lo hnawl a; rinawmna, dikna leh huaisenna nena ram tana ke pen turin ZPM chu kan inbuatsaih mek a, thawhrimna nena rorelna chelh tumin hma kan la mek a, kan la zel dawn a ni. Mahni hlutna pawh hralh duh khawpa rilru piangsual kan ramah kan awm fo thin hi a zahthlak hle a, LMC election leh MLA election lo awm turah hian kan chhia leh tha hriatna thiang tak hmang ngam turin ram mipuite ka sawm tak meuh meuh che u a ni. Kan ram dinhmun ngun taka en hian lung a awi thei lova, kum naupang te tea thihna tam lutuk te hian rilru a ti na takzet a, nang leh kei hi a siam tha theitu kan ni a. Mi awkhrawl leh mi diklo ten rorelna fawng an vawn zel lohna turin ZPM chuan hma a la zel dawn a ni. Lunglei mipui zawng zawng te, LMC thlan lo awm mai turah ngun taka ngaihtuahna hmang chunga vote thlak turin ka sawm a che u,” a ti bawk.
Vawiin inkhawmah hian Upa C Lianzuala, Adviser chuan hunserh hmangin Er. Lalhmingliana, General Secretary chuan lawmluh te chanchin tlangpui a sawi a; lawmluhte atangin thusawi ngaihnawm tak tak leh tunhnaia zin report-te ngaihthlak a ni bawk.
