Kan ram inrelbawl dan hi mitin kan hmu vek a, kan zavai hian kan duh thu a sam lo a ni : C.Lalsawivunga

Vawiin khan ZPM Friday Political Session neih a ni a, Pu Rosiamhnuna Khawlhring, Chairman, Upa Committee chuan kaihruaiin C Lalsawivunga, Aizawl South – I MLA chuan thu a sawi. Lalmuanpuia Punte, General Secretary, ADC leh Minorities enkawltu chuan ADC leh Minorities huam chhunga ZPM hmalakna hrang hrang report a pe bawk.

C Lalsawivunga chuan, “Kan ram inrelbawl dan hi mitin kan hmu vek a, kan zavai hian kan duh thu a sam lo a ni. Politics hi a pawimawh a, Kohhran mi, sumdawng kan ni emaw, contractor, zirlai, Sorkar hnathawk, awm mai mai pawh ni ila, politics hian nitinin min ngheng a; ram rorelna hmanrua a ni a, ram roreltu kan siamna hmanrua a ni. Kan ram dinhmun kan thlirin siamthat a ngai. Chumi siamthat hna thawk tur chuan kan zavaiin mawh kan phur, chutah chuan kan zavaiin kan ralbang thei lo a. Politics tha ngaihtuah chungin, kan hma hun lo awm tura ngaihtuahna tha hmang tuin zoram mipuite ka ngen a ni,” a ti.

Aizawl South – I MLA chuan, “Party pahnih rorelna hnuaiah kum engemawzat kan lo awm tawh a. Kan ram a roreltute hian party atchilhnaah min hruailut a, an party nih ve loh chuan engmah chanvo neihve lohnaah min hruailut a, mi tlemte te inhaivurna lam kawnga kan ram rorelna a kal hi a tha lo tak zet a ni. Party induhsak bikna hi a rei lutuk tawh, kan Mizo khawsak phung a tichhe nasa lutuk tawh, chutiang ang rorelna avang chuan hmasawnna a khairual thei lo, rorelna tha a awm thei lo. Dan hian awmzia a nei lo, inenkawlna leh inkaihrhuaina mumal a awm lo a, a thei apiangte intih milenna huangah kan ram rorelna hi a awm a ni. Mi harsate dinhmun a chhe tual tual a, mi tlemte dinhmun a kang zel a, chuvangin mi hausa leh rethei inkar a zau tulh tulh a, hemi siamtha tur hian zoram mipui zawng zawng kan sawm a ni. Tun aia awmze nei zawk leh tha zawk kan beisei tur a ni a, chumi beiseitute chuan beiseina thar nen ZPM-ah lo lawi lut zel turin ka sawm che u a ni,” a ti bawk.

Sawivunga chuan, “Kan ramin Chief Minister tha, hruaitu tha a mamawh. Chief Minister tha pawimawhzia mipuiten i ngaihtuah chiang ang u. Chief Minister ni bawk, Finance Minister ni bawk, Party President ni bawk te hruaina hnuaiah mipui kan kun a, kan mang a ang a nih hi. Chumi lak ata talchhuak tur chuan kan vote hmangin roreltu tha kan siam a ngai. Chief Minister tha nei turin ngaihtuahna i siam ang u. Delhi sawrkar kan hria a, an Chief Minister tur an duh a, khawi bialah pawh an MLA candidate te an thlangtling a, Chief Minister tha an nei mai a ni. Kan bialah tunge lo ding dawn tih ngaihtuah a tul lo; bialtinah ZPM candidate kan vote tlin khan Chief Minister tha kan vote chhuak mai dawn a ni,” a ti bawk.

Lalmuanpuia Punte, General Secretary chuan, “Hmasawnna hi a tha a, chutih ruala kan ngaihtuah tel ngai chu, chu hmasawnna chuan kan hnam himna a khawih chhe tel em tih hi a ni. A pawimawh hmasa ber chu kan ram, hnam leh sakhua a him a ngai a. Chumi ti derthawng thei hmasawnna chu hmasawnna khingbai, hnam tana hlauhawm tak a ni a. Hetiang ngaihtuah phak lo hruaitu Mizoram hian a neih a hlauhawm hle a ni,” a ti bawk.