Vawiin khan Excise Minister Er.Lalrinawma chuan Excise Commissioner Office, Aizawl District Excise Office, Rangvamual Outpost leh Bawngkawn Excise ram a tlawh a. Ngurchungnunga Sailo, Commissioner leh a thawhpui ten lo an lo dawngsawng a ni.
Minister chuan Excise Department-a thawktute chu midang tana inpe thin leh midang nunna hial chhanhimsak thintu an ni, a ti a, thahnemngai taka an thawh rah hian mimal leh chhungkua, khawtlang himna a thlen phah fo thin a ni a ti. Ruihlo leh a kaihnawihin chhungkua leh mimal, a bik takin thalaite a tibuai nasa chu a vei thu Er. Lalrinawma chuan a sawi a. Khawtlang mipuite leh tlawmngai pawl te nena thawhhona tha neih zel a pawimawh thu a sawi bawk a ni. Minister chuan Excise Department-a thawktute chu kumthar chibai bukna neiin an hnathawhna leh Department thil thleng chu inhrilhhriat zel tha a tih thu a sawi bawk.
Er. Lalrinawma hian Commissioner office-a room hrang hrang Laboratory, Establishment, Thana-te fang kualin thil tul leh mamawhte sawi ho a ni a. Aizawl District Excise office tlawhin Asst. Commissioner Pu T.Lalramzauva’n a lo dawngsawng a, thil tul leh mamawh te an sawiho a ni. Excise & Narcotic, Rangvamual Out Post a tlawh bawk a, chumi hnuah Bawngkawn Thuampui road-a Excise ram te a enfiah a ni.
Minister hi K. Liantlinga, Ex-MLA, Vice Chairman Social Welfare Board; KT Beichho, Principal Secretary leh Excise Department atanga official thahnem takin an tawiawm a ni.
