Vawiin November 11, 2022 khan Congress Party Friday Political Session, Congress Bhavan, Aizawlah neih a ni a. Session hi Pu Sangzela Tlau, Secretary, MPCC-in a kaihruai a, Lalsawta, President leh R. Vanlaltluanga, tunhnaia MNF atanga Congress zawm tharten thu an sawi a ni.
Lalsawta, President, MPCC chuan thu sawiin, “MNF sorkar hi Mizoram tan an that loh em avangin nasa takin kan la bei dawn chauh. Mara District-ah min sawm nasat em avang leh Mara lama kan hruaituten Mara mipui an ngaihtuah em avangin sorkarna an siampui a. Hei hi Congress Party-in mipui tana kan hmalakna turah min daltu tur a nih dawn chuan Mara District-a min support-na pawh saw MNF hian withdraw mai rawh se. Mara District-a min thlawp avanga Congress Party hi zuamawm a min ngai a nih a, an zarzo tu anga min ngai dawn a nih chuan an duh hun hunah withraw rawh se,” a ti.
Lalsawta chuan, “Vawiina hna tul dang kalsana Party tana hnathawktu zawng zawngte hi Party worker an ni lo, ram leh hnam hmangaihna avanga chan huama thawktu, sorkar tha siam duh avanga lo kalkhawm thin an ni. Communist ramah chuan inkohna bikte neiin Party worker lal tak tak an awm thin a, mipui nawlpuiin an hlau em em thin, hetiang ang hi Mizorama Party mite hi an ni ve lo, ” a ti bawk.
Danglam ngam a ngai tawh tih sawiin, “Mizoram hian hun reilote chhungin hun thar kan chuang kai tih i hria ang u. Mipui hian thil thar an duh a, an beisei tlat tawh. Keini pawhin tunhma a kan tih thin tam takte kha kan tih a rem tawh lo. Mipui hian sorkar tha, eiru lo, mipui hmangaihtu an duh tawh. Mi leh sa ngai reng pawh ni mah ila, kan rilru leh ngaihtuahna hi kan siamthar a ngai a ni. A hlui ang ringawta kal tumna hi i bansan ang u. Kan danglam ngam tur a ni. Mipui rawngbawlna hi kawng nuam a ni lo a, kawng chho, kawng hahthlak tak a ni; nawmsak tum tan mipui rawng a bawl theih loh. Kan tawrh a ngai a, kan inpek a ngai. Ram siamthat kan tumnaah hian kan party kan sorkarna tur a nih phawt chuan kan inpek ral a ngai dawn, ‘A tul chuan midang ka kian thei e,’ kan tih ngam hial a ngai ang,” a ti.
“Mizoram hi eirukna nen natna chi hrang hrangin min bawm mek a. Heng zawng zawng hi Congress hian Pathian tanpuina zarah a damdawi kan nei e. Keini chu kan corrupt ve lo ang, keini chuan mipui kan hmangaih a, an tana tha tur hlirin kan ti dawn. Vawiinah hian thil tih theih loh ka sawi lo, ram danga pawh an tih theih, keini pawhin kan tih theih ve ngei thil ka sawi a ni,” a ti.
Pu R. Vanlaltluanga, MNF Secretary, tunhnaia Congress Party zawm thartu chuan thu sawiin, “Party hrang hrang atanga Congress Party a lo lutte duhsak taka in lo tuamhlawm thin dan te, Congress laimu that ziate hi ka zirchiang a, a ropui ka ti hle a ni, ” a ti.
R. Vanlaltluanga chuan, “ZNP kha Pathianin chawichhuak dawn se chu hun tha tak tak a tam khawp mai. Mahse, sorkar tur tak takin mipuiin an duh ngai lo a, babel in sang sa tur ang deuh a ni a, chung lamin rem a ti lo aniang, rem lohna a awm zel thin. ZPM pawh hi boruak tha tak angin lang mah se, rorelna chang tak tak tur chuan mipuiin an ring tak tak chuang lo. MNF dinhmun kan hria a, MNF sorkarna hnuaia sum leh pai harsat zia kan hria a, hmasawnna pawh a kal hleithei lo. Sorkar inrelbawlna senso ti tlem turin hmalak a ni ang an tih laiin Board phuahchawp tam tak an siam a, sorkar hnathawk fel tak takte ring zo lovin Adviser to CM an phuahchawp a. Ram hmasawnna hna an thawk thei tak tak lo. Congress-in mi rintlak, sum leh pai enkawla mi hmingtha em em, a chanchin pawh sawi nuam tak Pu Lalsawta President kan nei a, midangte tana malsawmna thlentu lo ni tawh thin Congress Party hi a sorkar leh ngei a ngai a ni,” a ti.
“Kan society hi kalphung dika kan kalpui chuan ram leh hnam hmasawnna hi a thleng thei chauh ang tih hi ka rindan a ni. Kum 5 chhung sorkar tha tak kan kalpui theih chuan a tirah mipuiin zo lo mah se, kum 5 a liam meuh chuan mipui pawhin sorkar tha hnuaia kal an thiam mai ang. Ram hruaitu ni tura tehna fel tak kan neih a ngai. Khawhar in kal taima, dam lo kan taima tih ringawt hi mi tha teh nan i hmang tawh lo ang u,” a ti bawk.
