Vawiin November ni 11, 2022 (Zirtawpni) hian Mizo Hnam Runah chhung inkhawm neih a ni a. Hun hnihnaah Lalrintluanga Sailo, MNF Adviser leh Deputy Chief Whip ni bawk chuan thu a sawi.
Lalrintluanga Sailo chuan ‘Mizoram leh Mizo hnam tana awm reng MNF chu kum 60 chuang a ni tawh a, hnam thuthlung kengtu leh chawi nungtu kan nihna hre rengin MNF sorkar apiangin Mizoram ramri a zauh belh zel hi lawm awm ka ti. Nationalism rah chhhuah tih a chiang hle a ni’ a ti.
Lalrintluanga chuan MNF President Pu Zoramthanga hi tuna Mizorama Party tinte hian kan chawimawi hlein ka hria a, Congress President, ZPM Leader leh BJP President-te hi MNF Party Pumchhuak, a kaihza vengtu Zoram Politics- a a chherchhuah ṭhiau an ni. Kum 2023 inthlanpui lo awm turah pawh MNF party in hnehna kan chan ngei ka ring tlat a ni, a ti.
Deputy Chief Whip chuan MNF sorkar hnuah harsatna hrang hrang a thleng tih sawiin, ‘Hrileng vangin kumhnih chhung Kohhran ho pawh inkhawm thei miah loin, Zirna In leh Sumdawnna zawng zawng kal hlei thei loin kan awm a. Chumai ni loin Khawchhak lamah Lirnghing mak tak mai, nikhatah pawh vawi engemawzat nghing ringawt maiin min tibuai a. Chumai ni loin ramri buai, ṭum danga kan tawn ngai loh leh kan la hriat ngai loh, inkah ngai hialin a thleng a. Kan châk lakluhna kawngpui danpinin kan awm a nih kha, a ti bawk.
Lalrintluanga chuan, khang harsatna nasa tak karah khan hruaitu ṭha leh rintlak Chief Minister Pu Zoramthanga kan nei a. Pathian kaihruaina changin mipuiten ei leh bar, nitin mamawh thilah harsatna lian lutuk tawk lovin tun hun hi kan thleng a ni. Min beitute hian eng thil pawh ti ila min bei zel dâwn, mahse, mipui tan kan beihna kawngah kan tangmar zel dawn a ni a ti. MNF MLA 28-te hian mahni inhaivur turin hma kan la hman lo, ram tan kan pen miah miah mai a ni, a ti.
