Vawiin November 11, 2022 ( Zirtawpni) chhun dar 12 : 00 khan President Vanlalruata kaihhruaiin PC Party OB meeting Kan Party Office Treasury Square ah kan nei.
He hunah hian President Vanlalruata chuan, ”Tunhnaiah Mizoram huam chhung Vairengte chheh vela ram leilung neitu Mizote hnena Assam sawrkarin compensation sum eng emaw zat a pe ni a thuthang awm hi PC Party chuan pawi kan tiin kan hre thiam lo hle a. Mizoram chhunga Assam rawn chet dan hi Mizoram sawrkar hian a haider lui tlat niin kan ngai bawk,” a ti.
Vanlalruata chuan, “Hetianga Assam sawrkarin Mizoram leilung chhunga inti neitu taka compensation an sem ngam ta mai hian Mizoram sawrkar an hlauh lohzia leh min pawisak lohzia an tilang chiang hle a. Hetianga mahni ram chhunga ṭhenawm state rawn sapatal dodal ngam lo leh Mizoram chhunga Assam sawrkar chet dan Mizoram sawrkarin a haider lui tlat hi dawihzepthlak kan ti a.”
Kum 2018 inthlan khan MNF Party hian Assam Chief Minister ngam loh chhan eng emaw tak a neih vang em ni ? kan ti a. MNF hian Assam CM lakah mipui hriat lohin kan ram an lo hralh fel der tawh zawk em ni tih hi ka zawhna a ni a ti bawk.
PC Party President chuan, ”Pathian leh kan ram tan” tih aupuitu MNF sawrkar hian Assam lakah kan ram an lo hralh a nih chuan ram leh hnam hmelmaah kan ngai a. A rang thei ang berin ramri chheh vela chengte thlamuan tur leh ram humhalh tura che vat turin Mizoram sawrkar ka phut a ni,” a ti bawk.
