SP CID (Crime) Mizoram hnuaia Crime & Economic Offences Police Station thar chu mipuite tan Shri. Devesh Chandra Srivastva, IPS, DGP, Mizoram chuan vawiin khan a hawng. Crime & Economic Offences Police Station hi SP CID (Crime), Mizoram Office building, Bungkawn, CID Complex, Aizawlah awmin a hnathawhna area hian Mizoram chhung a huam a ni.
A hawnna Program hi MPSOA Conference Hall-ah hman niin Chairman, Lalhuliana Fanai IPS, DIG (CID) chuan he hun hmang tura lo kal mi pawimawhte leh sawm bikte lawmna thu sawiin chibai a lo buk a ni. Deotosh KS Singh IPS, SP CID (Crime) chuan hun hmasa lama CID (Crime), Mizoram-in economic offences a lo buaipui tawh dan leh tuna Police Station thar hawn a lo nih dan tlangpui a sawifiah a; Chief Guest, Devesh Chandra Srivasta, IPS, DGP, Mizoram chuan Criminal Investigation Department hna pawimawh tak tak Mizoram Police Manual 2005-a lo ziah tawh chu kum 17 hnuah a taka tihhlawhtlin a lo ni ta chu lawmawm a tih thu a sawi a. He Police Station dinna tura ni 10 October 2022-a notification chhuah atanga ni 23 lek chhunga hawn theih a ni chu lawmawm a tih thu a sawi. John Neihlaia IPS, IGP Hqrs.-in lawmthu sawina a hman zawhin hun tih tawp a ni.
Kum 2008 khan Sawrkarin economic offences lam vila chhui turin ‘Wing’ a din a, tah chuan DIG CID chu Chairman niin, SP CID (Crime) chu Nodal Officer a ni a, SDPO/DySP 16 leh District tina Police Station 35-a OC-te chu Investigation Team an ni. Police Station hran siamsak an ni lo.
Kum 2010 khan SP CID (Crime) hnuaia staff awmsa pawt thenin Economic Offences Wing (EOW) branch din a ni a, He branch te reuh te hian vawiin thlengin sum leh pai inbumna chhui te, FIU-IND Suspicious Transaction Report (STR) chhui te, Mizoram Protection of Interests of Depositors Act 2002/2019 hnuaia case – mipui pawisa tihchingpenna chhui te, Non-Banking Financial Companies leh Unincorporated Bodies (UIBs) vil hna te thawkin sum tam tak tihchingpenna case engemaw zat an chhui tawh a ni.
CID (Crime), Mizoram hi State lian zawkte kalphung milin muang changin a inher rem ve zel a, kum 2020 khan CID (Crime) hnuaiah hian Mizorama Crime lian leh thiam thil thuk zawk ngai ang chi te, District hrang hrang khawih leh State dang kaihhnawi case ang chi te chhui thei turin Investigation Wing chu din alo ni tawh bawk a, PS erawh siam a ni lo.
Chutiang chuan vawiina hawn tak Crime & Economic Offences Police Station lo in irh chhuak tur hian Mizoram Police hi a lo inbuatsaih chho hret hret a, tunlai thiamna lo sang zel leh thil thar lo chhuak zelin sualna a tih pun belh tak zel avangin chumi do let tura ‘Crime & economic Offences Police Station’ Sawrkarin a lo hawng ta hi thil lawmawm tak a ni (vide No. D.11029/1/2022-HM dt. 10th October, 2022).
Heti hian SP CID (Crime), Mizoram hnuaiah Police Station 3 (pathum) a awm ta a, chungte chu – Spl. Narcotic PS (1995), Cyber Crime PS (2020) leh Crime & Economic Offences PS (2022) te an ni.
