Vawiin chawhnu dar 1 khan Serchhip District Hospital Building thar sakna tur chungchangah Joint Action Committee on Serchhip District Hospital Site te chuan Serchhip khawchhunga Village Council hrang hrang, YMA, MHIP, MUP Branch hrang hrang leh Welfare tin atanga pawl aiawh 2 theuh te Serchhip Kawnpui VC Hall ah Joint Meeting neihpuiin a hnuai a mi ang hian ban pharin Resolution an pass.
*RESOLUTION*
1. Joint Action Committee on Serchhip District Hospital Site ten a hmun ngaia Serchhip District Hospital sak a nih ngei theihna atana an hmalakna leh tun dinhmuna Guwahati High Court a PIL file an tum hi vawiin 21st Oct. 2022 Fri. 1:00pm a Serchhip khawchhunga VC hrang hrang, YMA, MHIP, MUP Branch hrang hrang leh Welfare Comtt. hrang hrang kalkhawm te chuan a tha kan tiin a tawp thlengin kan thlawp tlat dawn a ni.
2. Guwahati High Court a PIL File na atan hian a tuldan a zirin khawtlang huapin thawhlawm khawn nise kan ti.
Power Grid Corporation of India (Ltd) CSR Fund atangin Serchhip District Hospital sakna tur hian Rs.21 crores hmuh a ni a, hetihlai hian Serchhip Dist. NGO Co-Ordination Comtt.(NGOCC) ten Bukpui a sak an rawt thung. Mahse, ni 26th Sept. 2022 a Serchhip DC hova Joint Action Committee on Serchhip District Hospital Site te leh Serchhip Dist. NGO Co-Ordination Comtt. te Joint Meeting ah JAC ten Detailed Project Report(DPR) leh May ni 27, 2022 a Chief Minister hova Power Grid Corporation of India Ltd. leh Health Deptt. hotu ten Memorandum of Understanding an ziah ah a hmun ngaia sak tura engkim ruahman a ni tih an sawifiah hnu ah NGOCC lam ten Bukpui chu Hospital sakna tura an duhna hmun ni mahse Sorkar thutlukna apiang an pawm theih tur thu sawiin Joint Statement an siam a.
Chuti chung pawha Mizoram sorkar in Serchhip Dist. Hospital sakna tura thutlukna a la siam mai loh avangin ni 19th Oct. 2022 a JAC te Meeting chuan Guwahati High Court ah PIL thehluh mai nise tih an rel ta a, chumi chungchang chu vawiin 21st Oct. 2022 khan Serchhip Kawnpui Village Council Hall ah Serchhip khawchhunga VC hrang hrang leh NGO aiawh hrang hrang te Joint Meeting neihpuiin PIL file mai chu a hun tawh a ni tiin kalkhawm zawng zawng te hian ban pharin PIL file an duh thu an nemnghet ta a ni.
