Inthlan tibawlhhlawhtu pakhat chu dahkham politics hi a ni : K.Sapdanga

Vawiin khan ZPM chhung inkhawm neih a ni a, ZPM Working President K Sapdanga chuan thu sawiin, “Inthlan tibawlhhlawhtu pakhat chu dahkham politics hi a ni,” a ti.
K Sapdanga chuan, “Inthlan tibawlhhlawhtu pakhat chu dahkham politics hi a ni a. Mi thenkhat chuan Politics hi gambling atan an hmang thiam em em a, eng party-ah mah an buai ve lo. Pawl hrang hrangah maktaduai tel an dahkham thluah thin a. Hetianga thangkam ching zinga tam tak chu state pawn lam mi an ni nghe nghe. Tu pawl pawh lo sorkar se, leiba thin tur an nei vek a, contract, supply hna zawngin an inrulhtir thin. Heng dahkham politics rulh nan hian mipui pek tur chhiah tihpun a ngai a, a tuartu chu mipuite tho kan ni. Hei pawh hi do rem dan kawng awmchhun chu, chutiang mi thurualpuitute vote hmanga thenfai a ni,” a ti a. “Thluaka sum lut hlauhawmzia hi Kohhran lam platform atangin kan zir tawh a, mipuite pawh kan chiang thawkhat viau tawh awm e. Thuneihtute berin mipui sum (public money) an it tlat si chuan, pawn lam atanga khap beh chu a har khawp mai. Dodal dan awmchhun chu vote hmanga chawlhtir hi a ni deuh mai awm e. CBI te, Judiciary te pawh kan han thlamuanpui dawn thin a, cheng vaibelchhe kua thubuai chinfel tak mai dante khan min tihthaih a, kan thla a muang zo ta meuh lo a ni. Kan hmachhuan awmchhun chu vote thiltihtheihna hi a ni ta ber mai. Mi mangang zawng zawngte vote hmang tangkai turin kan sawm mawlh mawlh a ni,” a ti bawk.
K Sapdanga chuan, “August 16, 2022 khan kan Party Policy “Sustainable Development & Reform Policy” Vanapa Hall-ah kan tlangzarh a, Congress party unaute hian a lairil ‘Development leh Reform’ lai tak hi uar tak maiin min puanzarpui char char a. He ram siam thatna tlak nia an hriat vangin, a duang chhuaktu lam en lovin, anni pawh lo sorkar leh se an tih tum a nih an sawi hreh lo a, Party upa nge nge, politician hlun an nih a lang a, a duang chhuaktute aiin nasa takin an sawi thiam zawk lehnghal a. An party president a fakawm lehzual a, a hote thenkhatin an kamkhat phah ni awmin kan hria a, mahse mi dik a nih vangin a sawi thulh phah lo a, a chungah leh a party chungah Lawmthu kan sawi a ni. Ruling MNF pawh hian tlawmah la bik lo se, Congress unaute tihdan puitling tak hi zui ve se, ‘Sem Policy’ hi hnawlin, hna thawk tam tura inkaihhruaina Reform Policy hi lo pawm ve mai se a va lawmawm dawn em! Party pathumin Mizoram development hi sustain taka reform kan tum tlan chuan, kan rual u rualawt ngawih ngawihten thlamuang takin he ram hi an lo thlir ang a, Thangtharten beiseina thar an rawn nei bawk ang. Chutih hunah chuan, he kan ram hi a pumin, a mi chengte nen ‘That loh theih lohna bawm’ ah a lo chang tawh zawk dawn a ni,” a ti.
ZPM Working President chuan, “Kum 2023-a MLA inthlan hunah chuan, Congress party leh ZPM party-te thawkho tur angin an lo sawi palh thin a. Hetiang thawhho tum thu hi, party pahnihte hian eng level-ah mah kan la sawi si lo a, tumna pawh a awm hek lo. Chuvangin, mipuite hruai sual palh thei a ni dawnin kan hria a, khawngaiha lo sawi tawh lo hram turin media hmangin kan ngen tawh a, kan ngenna pawh an ngai pawimawh a, tunah chuan an sawi chhunzawm tawh lo niin kan hria a, kan ngenna min zahsak a, min zawmsak avangin an chungah kan lawm takzet bawk a ni. A lo ri leh palh a nih pawhin, thahnemngai falte duhthusam mai a ni tih lo hrethiam turin mipuite kan ngen a ni,” a ti bawk.