Mizorama aurinna hmanga khawtlang hriat tur inhrilhna – public address system tichhuaktu hmasa H Zakhawla (85) chu September 29 tlai dar 5.10 khan Aizawlah a thi.
Aizawl Republic Veng YMA leh KTP hruaitu hlun H Zakhawla hi YMA hruaitu an nih lai, kum 1985 kumtir lam khan Mizoram khawi hmunah mah an hman la hriat loh, vantlang aurinna siam hi an hruaitu dangte nen rawt chhuakin microphone, amplifier, loudspeaker (long horn) leh mamawh dangte an zawng khawm a, ni thum chhung vel buaipuiin an wire neihin a tlin ang tawkin mic horn pathum – Venghlun (Mission Veng hnaih lam), Hmar Veng (Venghlui hnaih lam) leh Govt Republic Middle School-II bul (ITI Veng lam hnaihah) te mic horn an dah a, mi 5 velin buaipuiin thingkung hrang hranga electric wire an thlunzawm a ni. Amplifier hi 12 volts (Philips company siam) hmangin Pu H Zakhawla te inah hian khawl an dah a, a ni hi tuktin a autu/ tlangau ah a tang thin a, khawtlang tana hriat tur pawimawh bakah Pathian thuchah te a sawi thin.
Thudawn danin hemi hnu hian Local Administration Department chuan mic horn leh electric wire hi Aizawl veng hrang hranga hman turin a sem ta a, veng hrang hrang pawhin PA system hi an nei chho ve ta a ni.
