PC Party Thalai chuan thuchhuah siamin, “Aizawl khawpuia New Market Building kum 2020 a ṭhiah tawh vawiin thlenga sak ṭhat a la nih loh avanga chhungkaw ṭhahnem tak eizawnna chat lak a awm mèk te PC Ṭhalaite chuan lainatawm kan ti takzet a. An chaw bel pal buak saktu Mizoram sawrkar kan dem takzet.
“New Market Sumdawng Joint Association ( NMSJA) hruaituten an ei bâr dap na hmunpui ṭhiah a awm, tungding thuai tura Mizoram sawrkar an ngen ṭhinna te dawt hmanga Mizoram sawrkarin a chhan let ṭhin avanga lunghnur taka awm mek te thinurna a sosan hma leh buaina leh harsatna lian zawk a thlen hma ngei a, a rang thei ang bera New Market building hi sa ngei tawh turin PC Ṭhalaite chuan Mizoram sawrkar kan phut takzet a ni.
“Deputy Chief Minister zahawm tak Pu Tawnluia’n December 2021 a New Market Building sakna atan a January 2022- ah Tender koh a nih tur thu NMSJA hruaitute hnena a sawi chu a tak ram hmuh tur a awm lova, Assembly Session ah March 2022 ah Tender koh a nih tur thu a sawi pawh rintlak a ni leh chuang lo va, chumi hnuah Smart City CEO in July 2022-ah Tender koh a nih tur thu a sawi leh pawh hi engmahlo mai a ni leh a.
“Hetianga ram bung khat hruaitu lu Deputy Chief Minister meuh leh sawrkar Officer lian in khua leh tui te harsatna sutkian sak aia an phurrit belh chhah zawnga an inlulin khum duh ta mai hi PC Ṭhalaite chuan demawm kan tiin, an hna chanpual kengkawh zo lo leh thawk zui tlakah kan ngai lo a. Deputy CM hian UDPA hi mi dang kutah hlan ngam se Smart City CEO chan pual pawh hi mi dang kuta hlan turin PC Ṭhalaite chuan Mizoram sawrkar kan phut a ni,” an ti bawk.
