Chhungkaw 160 velte leileta buh chu rannungin ti chhia

Tlabung Sub-Division huamchhung Khojoysury VC-a chhungkaw 160 bawr velte leileta buh chu rannung chi khat brown planthopper-in a eichhiat sak. Leilet siamtute harsatna tawh dan hi nilaini khan Lunglei District Agriculture Officer C Malsawmkima’n a hmunah a enfiah a ni.
Lunglei DAO chuan, Khojoysury VC huamchhunga chhungkaw 160-ten, brown planthopper-in an leileta buh a eichhiat vanga harsatna an tawk chu pawi a tih thu sawiin, “Kan farmer-te tuarna hi department ang pawhin hrehawm kan ti a, kan tuarpui takzet a ni,” a ti a; rannungin buh thahnem tak tichhe hman mah se, a tam zawk chu chhan theih an inbeisei tih a sawi.
Khojoysury-a leileta buh eichhetu brown planthopper chu Mizoten katnelh kan tih mai thin a ni tih, C Malsawmkima chuan sawiin, “Hetiang hi an lifespan a thui lo a, rei lo te chhungin an inthlahpung chak em em a ni,” a ti. Rannung thahna hlo an ken hmangin, tuna la chhe ve lo buh eng emaw zat chhan theih an inbeisei thu leh, anmahni puih theih dan kawng awm ang ang dap tura department-in theihtawp a chhuah tur thu a sawi.
Lunglei DAO tawiawmtu Agricultural Technology Management Agency (ATMA) Dy. Project Director Pu John Laltluangliana chuan, buhin a huat em em an pai tel avangin planthopper-in a ei tawh buh kung chu a ro nghal mai zel niin a sawi a; tun tuma damdawi an ken chu rannung hnawhdarhna mai ni loin, a thah nghalna hlo a nih avangin, awmzia a neih ngei a beiseiawm thu a sawi.
Khojoysury khawtlang hruaitute chuan, tun tuma leilet siamtute harsatna tawh ang chu tun hmain an la tawng ngai loh tih an sawi a, kar hmasa vel atang khan hetiang harsatna an tawk tih an inhre tan niin an sawi. Harsatna B tawh chungchang sutkian dan kawng ngaihtuaha Lunglei DAO-in chak taka hma a la nghal chu lawmawm an tih thu leh thlamuanawm an tih thu an sawi a ni.
Hriat theih chinah Khojoysury khuaah tih loh, Tlabung chhehvel khaw dangah planthopper vanga leilet siamtuten harsatna an tawh thu hriat a ni rih lo.