PC Party President Lalhmangaiha Sailo chuan Thalai zawk kutah party kaihhruai hna dah tumin a president nihna a chawlhsan dawn.
Nimin khan a chenna in, Tuivamit-a party Elected Office Bearer thukhawmah he thu hi a puang chhuak a. Hetiang a nih tak avang hian September 7, 2022 (Nilaini) khian party kal zel dan tur relin meeting an ko nghal.
Lalhmangaiha Sailo chuan, βPathian malsawmna dawnga sorkar hna tha tak ka thawh hnuah kan ram siam that ka duhna avanga politics zawmin MPC Party-ah kum 10 chhung President ka ni a. MPC Party leh PRISM Party inzawmkhawma PC Party kan nih hnuah kum thum hmel hmu President ka ni bawk a. Heng hun chhung zawnga min hruaitu Pathian hnenah lawmthu ka sawi a. Ka thawhpuite leh min thlawp leh min puitu zawng zawng chungah lawmthu ka sawi a. MLA inthlana ka dina min puitu leh min vote-tu zawng zawng te, party ka kaihhruai chhunga kan party tana thawktu leh kan party vote-tu zawng zawng chungah lawmthu ka sawi bawk a ni.”
“Political party-a ka tel leh MLA Inthlan te chuha ram hruaitu nih tuma ka beihna te hi kan Ram leh Hnam tan ka thiam leh theihna te hmang a kan ram hi hma sawnpui ka duh vang a ni a. Ka pain kan ram hmasawnna tur a duan te kha kan ramin a mamawh ni a ka ngaih avangin tihhlawhtlin ngei ka duh tak meuh a ni.
“Vawiin, September ni 5, 2022 hian kan Party Sr. Vice President Pu Vanlalruata kutah hian kan party hruai hna ka hlan a. A ni hian ka pa vision-te tipuitling a, kan Ram leh Hnam hian hma a sawnpui theih ngei ringin keimah leh kan chhungkua, T. Sailo family zawng zawng chuan kan thlawp zel dawn a. Kan party mi leh ka thawhpui zawng zawng te, min thlawp leh pui ?hintu zawng zawng te leh mi zawng zawng, amah hi thlawp a, pui turin ka ngen takmeuh che u a ni.”
“Pu Vanlalruata kaihhruai hian kan Party kal zel dan tur leh hruaitu siam fel dan tur pawh rel a ni ang a. Pathian kaihhruaina nena kan Ram leh Hnam hmasawnna atana hlawhtlinna thawk chhuak turin duhsakna ka hlan a ni.” a ti bawk.