Aizawl 3rd September, 2022: Dampa bial fanga fehchhuak mek ZPM Leader Lalduhoma leh General Headquarters hruaitute chuan nizan khan Lallen Community Hall, tukin khan W.Phaileng Bazar Shed leh vawiin khan Rawpuichhip Bazar kawnah te vantlang inkhawm an nei.
Vantlang Inkhawm neihna hmun hrang hranga thusawitu ZPM Leader chuan, βKum 2018 inthlan dawna cheng nuai thum leh a aia tam sem min tiamtu ten an sawrkar atanga kum li (4) naah cheng singhnih sangnga a thuin min sem mek a, nuai thum sem min tiam a, cheng nuai thum hi mipuite hnenah an sem ngei tur a ni. Tihhlawhtlin leh theih loh tur hmanga mipuite bum chunga ram kaihhruai hi tum tur a ni lo. Intiamna chu intiamna a ni a, chhungtin hnena cheng nuai thum sem hi mipuite hnena an intiamna, mipuite laka an bat a ni. Tuna an kal dan, kum 4 dana cheng singhnih sangnga (25,000) inpek tum hian awmzia a nei lova, hetiang a nih chuan cheng nuai thum dawng tur chuan kum 48 chhung zet a ngai dawn a ni,β a ti.
Pu Duha chuan, βMizoram hi India rama State pachhe berte zinga mi kan ni a. Kum 2022-2023 Mizoram budget pumpui cheng vaibelchhe 14008.15 atanga Mizoram thawh ve chu cheng vaibelchhe 1637.73 (za zeal 11.69) chauh a ni. Hetiang hi kan dinhmun a nih lai a, sem policy hmanga inawih nun tum party te hi mipui ten kan hnawl ngam a hun tawh. Cheng nuai thum sem tur hian kan budget hian a daih lo hrim hrim a, chutiang chu kan dinhmun a ni tih hrereng chungin rorelna fawng chelh duh luatah mipuite min bum hi pawi an ti lo a ni. ZPM a sawrkar chuan hna hmasaah inrenchemna kalpui a ni ang a, state sum thawhchuah tipung turin nasa takin beihpui a thlak dawn a ni,β a ti bawk.
ZPM Leader chuan, βZPM chuan mipui vantlang hriselna dinhmun a ngaipawimawh dawn a. Tuna kan dinhmunah chuan hmun kilkhawr zawka chengten hamthatna an dawng chhe em em a, khawpuia cheng te nen ang khat renga hamthatna an dawn theih nan hma kan la dawn a, PHC/CHC leh Urban Primary Health Centre te tihchangtlun a ni ang a, District Hospital tinah ICU changtlung tak a awm theih nan hma lain, On-Call clinic hawn a ni ang a, thingtlang khaw kilkhawr ber atang pawha biak pawh zung zung theih turin buatsaih a ni dawn a ni,” a ti bawk.
ZPM Leader leh a team te hian Rawpuichhip Hmunhlui tlanga Eco-Tourism Circuit hluihlawm/pamtul tawh an tlawh bawk a. Hetianga ram hmelhmang lanna tur hmasawnna a pamtul leh mai thin hi pawi a tih chu ZPM Leader chuan a sawi. ZPM Leader hi General Headquarters hruaitute, Block leh Unit hruaitu engemawzatin an tawiawm a. West Phaileng, Kawnmawi, Chhippui leh Rawpuichhip khua atangtein ZPM zawm thar mi 247 a lawmlut bawk a ni. Rajiv Nagar, Phuldungsei Vengthar, West Phaileng, Under Manik-ah te ZPM Unit a ding thar a, West Phaileng leh Rajiv Nagar ah hian Thalai leh Zonu Unit a ding thar nghal bawk a ni.