Aizawl, 3/9/2022: Vawiin khan Congress Thalai (MPYCC) chuan Aizawl Bazarpui thiah tak MNF sorkarin a sak leh mai loh avanga eichawp zuar harsatna tawk mekte an tlawh a, an harsatnate an sawipui bakah, Silpauline thahnem tak an pe bawk.
MPYCC President Dr. Lalmalsawma Nghaka hova thawkchhuak Congress thalaite hi Chawhmeh Zuar Joint Association New Market, Aizawl hruaitu ten an lo dawng sawng a. MPYCC President Dr. Lalmalsawma Nghaka chuan thu sawiin, Bazarpui thiah tak hi Congress sorkar khan a sakna tur sum dah sa vek a nuh thu a sawi a. Bazara eichawp leh thil dang zuarte harsatna tawhah hian Mizoram chhungkaw tam tak a nghawng tih sawiin, chawmhmeh zuar nuho phei chuan hmunhma an neih miah loh avangin thutna in chhawka kal pui a ngai lo thei lo va, a tam berah thlalakah ni 12 vel awrh chauh an dawrte an hawng thei chauh, tih sawiin, MPYCC chuan thil ropui tak tih sak thei rih lo mahse an lainat takzet a, an harsatna sutkian a nih thuai theih nan theih tawpa hma an lakpui zel tur thu a sawi. “Pawisa awmsa reng kum 4 lai MNF sorkarin an up bet hi tha kan ti lo takzet a, MNF sorkar hian Bazarpui building hi lo sa thei tehreng pawh ni se engtia rei nge an sak dawn tih hriat a ni lo, Bazarpui building rang taka sak a nih theih nan hian court hial thlen kan hreh lo a ni,” a ti a, “Aizawl New Market sak that mek Aizawl City Centre Annexe building hna muang lutuk avanga chhungkaw 2000 zet tawrhna hi a pawi kan ti a, Sorkarin an harsatna sutkiang tura chak taka hma la turin kan phut a ni,” a ti bawk.
“Sorkar hmasa in bazaar pui building sak nan a cheng nuaih 3641.59 hman theih nghal a hnutchhiah chung pawha nasa taka ‘delay’ a ni zel hian ngaih a ti tha lo va, Bazar hmunpuia eizawng chhungkaw 2000 zet te eizawnna tur sum hi hmun dangah a hmang pen ta em ni tih hi kan zawhna lian tak a ni,” a ti.
“Congress Party chuan rim tak leh taima taka eizawnna thawkte hi ram tana mi pawimawh leh hlu an ti a, an dinhmun tha zawka an din hi a thupui ber a ni. Ruahpui leh ni sen sa hnuaiah rim taka theihtawpa eizawngte kan ngai pawimawh a, nangni ho hi a ni kan ngaihpawimawha ‘Tang Tanpuina’ kan tihah hian kan target in ni. Hausak thutna emaw, ‘in ”Millionaire ang’ tiin kan tiam ve thei lo che u. Mahse Congress kan lo sorkar hlauh anih chuan, dinhmun in sawhngheh theih nan leh in duha anga hma nasa zawka in lak theih nan ‘Tang Tanpuina’ hmangin ruahhmana kan siam dawn a ni a ti,” MPYCC President Dr. Lalmalsawma chuan a ti.
Chawhmeh Zuar Joint Association New Market hruaitute pawh in thu sawiin, chawhhmeh zuarte mittui tlakna a rei tawh hle a, vawiinah hian Congress Thalaite hi kan mittui tla-in a ko chhuak che u a ni. Mizoram khawpui ber Aizawla kan bazaar pui ber hi, khualzinte tan phei chuan tlawh tlak pawh a nih tak loh thu leh a zahthlak thu an sawi. Tuna Bazaar puia inzuar mek member 500 chuang niin, section 3-ah an in then Chung pawhin hmun hmain a zawh loh luttuk avangin, kar khat dana in thut chhawk te, ni thum dana an in thut chhawk thin. “Thutna hmun tlem vanga kan in thut chhawk hian, in zawrh hun kan nei tlem si a, sum tam tak kan hloh a, retheihna avangin kan rum mek a ni, an ti.
New Market Building pui ber sak that hna a kal mek a, Aizawl City Centre Annexe tih a ni. In satu chu Lushai Engineers an ni a, sum ruahman cheng nuai 3,641.59 chu K. Deposit-ah dah mek a ni. October 4, 2018 -ah kutthlak tan niin, thla 36 (kum 3) chhunga sak zawh tura tih a ni a, chutih laiin hnathawh tur zinga 35% chauh thawh ala ni a. MPYCC chuan Bazar pui sakna tur sum K-Deposit a dah chu MNF sorkarin sum enkawl a thiam loh avanga harsa nia sawiin hna in a tawrh phah ta niin a lang an ti a, chutih laiin MNF sorkar chu a duhnaah chuan sorrkar kalphung pel pawhin sum tam tak a hmang chhuak thin tho niin an sawi bawk.
Vawiin MPYCC Programme-ah hian President Dr. Lalmalsawma Nghaka, Vice President Pu Laltawnliana, General Secretaries ; Pu HP Lalchuailova, Pu Lalsanglura Sailo, Pu Khawpuimawia, Chief Organiser Lalnunzira leh Secretary Joseph Lalnuntluanga te an kal a ni.