MPCC Campaign Committee programme angin H. Rohluna, Ex Minister & Gen.Secy, MPCC leh a team te S. Lalrinawma, Gen. Secy MPYCC, Jerome Bawlte, Gen. Secy, NSUI te chuan nimin leh vawiin hian Kolasib bial chhung khaw hrang hrang an fang a, nimin khan Pangbalkawn, Meidum leh Bairabi-ah te hun an hman hnuah vawiin hian Kolasib Taitesena Hall-ah party workers meet an hmang leh a ni.
Thusawiin MPCC Gen Secy H. Rohluna chuan, “Kan ram sum leh pai dinhmun tlachhe sawp mek siam tha tur leh mipui huapzo sawrkar siam turin MPCC President Pu Lalsawta hi kan ring tawk a, Mizo mipui a hrechiang apiang ten Pu Lalsawta hova sawrkar tha siam hi min duhpuiin an nghakhlel em em a ni,” a ti.
H.Rohluna chuan, “MNF sawrkar hi an sawrkar hmasak lai pawha Mizoram lei ba thanga min awh tirtu a ni a, chu leiba laka Zoram mipuite min chhanchhuaktu chu , tuna MPCC President leh kan Chief Ministerial Candidate
Pu Lalsawta hi a ni a. MNF symbol hi Arsi a nih angin khawthimah a eng a lang chiang thin ang hian a en apiangin Mizoram hi thimin min tlak buak a, a en zual zel i hlau ang u. Tuna kan sawrkarna an kalpui dan pawh hi mipuiin an nuihzat a, an lakah beiseina an nei tawh lo,” a ti bawk.
ZPM party chungchang pawh sawiin H Rohluna chuan, “ZPM te hi pawl hrang hrang awm khawm an ni a, bel keh phuarkhawm tui pai thei lo ang an ni a, anmahni party chhungah hian an la buai tawk em em rih a, mahni party chhungkua pawh chingfel thei lote hi Mizoram kaihruai tur khawpin mipui ten an la ring tawk lo a ni,” a ti bawk.
Party workers meet hi Kolasib Block President Pu Lalchanhlua Pachuau chuan a kaihruai a, Kolasib khawpui chhunga Congress Block leh Unit hruaitu thahnem tak an tel a, VC bye election neihna tur Kolasib Venglai leh Bairabi North-ah Congress candidate te thlan tlin an nih ngei theih nan theihtawp chhuah an tum a ni.