Joint Action Committee on Serchhip District Hospital Site hruaitute chuan vawiin (Aug. 30, 22) khan Serchhip Press Club ah chanchinbumite kawmin, Power Grid Corporation of India (Ltd) CSR Fund atanga Serchhip District Hospital sakna tur Rs.21 crores an hmuh, 27th May 2022 daih a CM ho meuhva MoU ziah tawh chu sak thuai an phut tih an sawi a, CM duhdan angin Health Minister in hma a lak thuai an beisei a, hetihlai hian Serchhip Constituency chhunga Hospital awm lai sawnchhuah tuma Tuikum Bialtu MLA lo phe ve sek chu an ngaimawh hle tih an tarlang.
Press Conference hi Joint Action Committee on Serchhip District Hospital Site Chairman Kapliana Pachuau-in a kaihruai a, “Serchhip District mipuiin tangkai taka kan hman mek Serchhip District Hospital Building thar Power Grid Corporation of India (Ltd) CSR Fund Rs. 21 crore hmanga sak a ni tur hi kan lawm hle a. He Rs.Vbc 21 hi a hmun ngaia Hospital Building thar sakna tura Detailed Project Report (DPR) siam, dilchhuah leh pek a nih ang ngeia sak thuai hi kan phut tlat a ni” a ti.
JAC Chairman chuan “Serchhip Dist. Hospital thar sakna atan hian NGO Co-Ordination Comtt. ten Bukpui ram an rawt a(Hemi tum hian Joint VC te pawh an telve nghe nghe), kan Chief Minister zahawm tak Pu Zoramthanga pawhin July ni 25, 2022 Mon. khan Serchhip Auditorium ah Bukpui rama sak a nih tur thu a rawn puang a, Serchhip mipui pawh kan nghing dual a nih kha.
“Hemi hnu hian Joint Action Committee on Serchhip District Hospital Site hruaitu ten VC, YMA, MHIP leh MUP Branch hrang hrangah ngaihdan an la ta a, CM hi Aug. ni 16, 2022 khan a Office ah thil awmdan hrilhin a hmun ngaia Hospital Building thar sak duh Serchhip mipuiah an tam zawk zia Seal leh Signature hmanga VC, YMA, MHIP leh MUP Branch hrang hrang ten an tarlanna leh nikhat thilthu a Serchhip Bazar a Signature an lakkhawm te an hlan a. Hemi tum hian CM pawhin Health Minister Dr.R.Lalthangliana chu thil awmzia lo hrilh a, Health Deptt. thuneitute Serchhip ah rawn tirhchhohva, Hospital thiah chhunga lo luah lailawk tur lo enpui turin JAC hruaitute hi a lo ngen a, a chungah JAC hruaitute pawh kan lawm hle a ni.” a ti a.
“Hetiang a nih avang hian kan Chief Minister zahawm tak Pu Zoramthanga duhdan angin kan Health Minister zahawm tak Dr. R.Lalthangliana pawh hi hma la thuai a, CM duhdan anga Health Deptt. thuneitute Serchhip ah rawn tirchhova, Hospital thiah chhunga luah lailawk tur Building enfel thuai kan phut a ni” a ti.
A sawizelna ah JAC Chairman Kapliana Pachuau chuan “Serchhip Dist. Hospital Bukpui daia sawnchhuah a nih theihna atan hian Tuikum Bialtu MLA Er.Lalrinawma’n nasa taka hma la in CM leh Health Minister te, Health Deptt. Official te thlengin na takin a kar niin kan lo hria a, hei hi tak tak a nih chuan a pawi kan ti hle a. Serchhip Dist. Hospital hi Serchhip Constituency atangin engtikawngzawng mahin Tuikum Constituency ah sawnchhuah kan phal ngai dawn lova, kan Hospital min sawnchhuahsak tuma a hmalakna hi chawlhsan tawh se kan duh hle a ni” a ti bawk.