AMC Conference Hall-ah vawiin khan Swatchh Bharat Mission (Urban) zirchhianna hun AMC Councillor ten an hmang a, he hunah hian Aizawl Mayor Lalrinenga Sailo chuan thu sawiin, nimin lama Executive Council thukhawmin thutlukna a siam angin, Building Regulation chu khauh zawka kalpui a nih tur thu a sawi a, Dan zawmlote hremna (pawisa fine) pawh a letsawm (10)-a tihpun a ni dawn a ni, a ti.
Aizawl Mayor chuan, hun kal tawhah building permit ang loa in sa tute chu pawisa chawitira permit pek chhunzawm a lo ni thin a nih pawhin, tun atang chuan hremna (penalty) hian permit pek kawngah awmzia a nei tawh dawn loh thu sawiin, “Penalty hi ngaihdamna a ni tawh lo ang,” a ti. AMC dan zawmlote chu dan angin maximum penalty (lungin tan) thlenga hrem an ni ang, a ti.
Lalrinenga Sailo chuan Councillor-ten bial tana thahnemngaihna chu fakawm a tih thu a sawi a, thangtharte chenna tlaka Aizawl khawpui siam tura a enkawl kawnga thawkho zel turin councillor-te a sawm a ni.
Sensitization Programme on SBM (U) for Councillors hi Zothanmawia, Municipal Commissioner-in a kaihruaia. Malsawmzuala, Joint Director (Admin), UD&PA Deptt. leh Lalhruaitluangi, Deputy Director (HQ), UD&PA Department te hnen atang presentation ngaihthlak a ni; SBM kalphung leh thil hrang hrang te hrilhfiahna huan hman a nih hnu hian sawiho na hun hman chhungzawm a ni.
Programme-ah hian AMC councillor te an kal tha hle a; councillor bakah Lalhmingthanga, Joint Municipal Commissioner, UD&PA Department leh AMC official dang ten an tawiawm bawk a ni.