AAP Mizoram Vice President Lalngaihawma Pachuau chuan, “Kan hriat theuh angin Central lamah BJP in Aam Aadmi Party a bei nasa em em a, AAP MLA pawh lei tumin an thlem nasa tih kan hre vek awm e. BJP chuan Mi Naran ten thi leh thau pawlh a an thawhchhuah atanga pawisa an chhun luh, Tax chu nasa takin an duhnaah an hmang a, chutih laiin an thian Billionaire-te Tax an ngaidam leh si a ni,” a ti.
Lalngaihawma Pachuau chuan, “BJP chuan mipuite pawisa in MLA-te an leiin an thlem a, Maharastra, Goa, Karnataka, Asssam, Madhya Pradesh, Bihar leh Arunachal Pradesh sawrkar an tichhe mek a ni. Mipuite’n duh tak leh beisei sang taka an thlan sawrkar chu pawisa hmangin an tichhe mek a, MLA leinan pawisa tam tham tak an seng mek a ni. BJP chuan hetiang kalphung hmang hian State hrang hrang tihchhiat an tum mek a ni. Heng state-ah hian MLA 277 lai an lei tawh a, CBI/ED chhui pawh an hlau tawh hial a ni. Heng MLA leinan hian Crore 5500 lai an seng tawh a ni,” a ti.
“Delhi-ah ngei pawh BJP-te hian AAP MLA leinan Crore 800 chuang an thehchhuak a ni. India rama MLA leinan Crore 6300 chuang an thehchhuak tawh tihna a ni a. MLA 40 neih hi an tum em em a. BJP ho zawhna kan zawh duh chu, heng pawisa hi khawi atanga an neih nge? Tute pawisa tlingkhawm nge? Tunah hian ramchhungah pawisa tam thut avanga thil tona (Inflation) a nasa in a hluar em em a, heihi Mizoram-ah ngei pawh a nasa hle a, hei hian Mi Naran-te min ti lungngai mek a ni.
“Kum 2014 khan Diesel hi Rs 54 a ni a, tunah Rs 90, Kum 2014 khan Petrol hi Rs 60 a ni a, tunah Rs 110 a ni mek a ni.
“Hetiang tho hian India ram hmun hrang hrang-ah thil man a to nasa em em a, a thente phei chu a let hnih/thum ten a pung hial a ni. He inflation hian GST a tisang em em a ni. Heng GST atanga pawisa lut hi khawnge a awm? Eng atana hman nge a ni? BJP hian mi hausate an duhsak em em laiin mi rethei zawkte pawisa an sawk nasa hle a, heng mi rethei pawisa tling khawm hi Modi-a tha tih chaknan an hmang a ni,” a ti.
AAP Mizoram Vice President chuan, “Tunhnai a Red Fort a thu a sawi naah PM hian eirukna do tura tanrual a ngaih thu a sawi a, chu chu Delhi CM Kejriwal-a chuan PM hnenah mipuite ngaihven thil panga a hrilh a, PM Modi-a hian eirukna (corruption) a do tak tak a nih chuan chhuichhianna hmangin lantir rawh se, tih hi AAP chuan kan phut a ni,” tiin a hnuai a mi ang hian an press Statement ah an tarlang bawk.
– Tunhnaiah Gujarat-ah thalai exam mai turte paper leak avangin an buai hle a ni. Kum 27 chhung Gujarat-ah BJP in rorelna an chang tawh a, Modi-a hian heng thilte hi a ngaimawh a nih chuan thil tisual tute hi jail bang zuttir ngei rawh se.
– Gujarat-ah drug crore 22,000 chuan Modi-a thian hnai tak atangin an man tawh a, Modi-a hian Drugs a ngaimawh a nih takzet chuan Gujarat inthlan hma ngeiin Chhuichiantir rawh se.
– Gujarat-ah Zu thalo in avangin mi 55 aia tam an thi tawh a, he zu dawr neitu hi BJP hruaitu ta a ni. Modi a hian zu thalo zawrh hi a ngai pawimawh a nih takzet chuan Chhuichian tir rawh se?
– Crore nuai 10.72 chu Industry lian tak tak neitute atangin an ngaidam a, heng industry neitute hi mi lian, Modi-a thian hnaivai tak takte an ni. Anni ho hian BJP-ah Cheque in donation tam tak tak an pe thin a ni. Hei aia nasa corruption hi a awm chuang em ni? Corruption hi in ngaimawh a nih tak tak chuan Gujarat election hma ngeiin CBI/ED te chhui tir ula, thil ti dik lotu chu man tir ngei rawh u.
AAP Vice President Lalngaihawm Pachuau chuan BJP Sawrkar chu an ?hian Mi hausa te chhiah awl a, mi rethei zawkte neih ang ang laksak ching Party leh thilman tito a, a hlawkna chu an mahni party hlawknan leh MLA leinan a hmang party an nih thu a sawi. Pu Lalngaihawma chuan AAP chu miretheite party an ni a, mi harsa zawkte tan an thawh zel tur a sawi bawk a ni. Lalngaihawma chuan AAP hian Mizoram-ah sawrkarna an chelh ve a nih ngai chuan AAP Chief Minister chuan Department chan bik neilo in a hnuaia minister leh MLA te a vil zawk tur thu a sawi bawk.