Sorkar pawisa hi mipui pawisa a ni : Lalrindika Ralte, MLA

Lalrindika Ralte, Hachhek bialtu MLA chuan MPCC Tomir Fehchhuah hman pahin a bial chhunga South Block area a tlawh mek a. Khaw hrang hrang Darlak, Bunghmun, Thaidawr, Mualthuam, Belkhai bakah Jampui tlangdunga Mizoram lam chan khuate – New Kawnpui, Zomuantlang, Phuldungsei khuate a tlawh tawh a. Congress Party memberte bakah VC leh NGO hruaitute nen inkawmhona hun hlimawm tak hman a ni.
Bial a fanna hmun hrang hrangah hian thu sawiin Lalrindika Ralte, MLA chuan, “Israel fate kha Pathianin hruaitu tur a ruatsak thin a, hriak a thih hial thin. Tunlai hunah erawh chuan ram hruaitute hi Pathian ruat kan ni vek ta lo em ni tih tur a ni fo mai. Ram kan hruai duh dan en hian Pathian ruat kan ang lo thin a ni. Pathian ruat kan ni ti a kan dik lohnaah pawh sawisel thiang lo anga kan indah a nih phei chuan a dik hauh lo ang” a ti.
Sorkar pawisa hi mipui pawisa a nih avangin fimkhur taka hman a ngai tih sawiin, “Sorkar pawisa kan tih thin hi mipui pawisa, mipui thawhchhuah vek a ni tih chiang taka kan hriat a ngai. Thil kan lei leh kan hmanna reng rengah hian direct leh indirect-in sorkarah chhiah kan pe vek a, chumi tlingkhawm chu sorkar pawisa kan tih hi a ni. Sorkar pawisa hi Party fund a ni lo a, politics khelh nana hman tur a ni lo. NLUP a nih avangin Congress pawisa a ni lo a, SEDP a nih tak avang hian MNF pawisa a ni hek lo; sorkar pawisa, mipui pawisa tho a ni. Sorkar pawisa hmanga campaign a, development tawktarh a mipui leh khawtlang hruaitute thlem ching politician kan la nei hi a vanduaithlak ka ti. ‘Min vote chuan hei hi ka tih sak ang che u,’ ti a mipui chhiah pek tlingkhawm hmanga mipui thlem ngam ngat ram hruaitu kan nei hi a vanduaithlak takzet a, hetiang mite hi kan hnawl ngam a ngai a ni. Vawiin a khawtlanga hmasawnna hna lo kal zawng zawngte hi Party fund a ni lo a, mipui pawisa a ni. MLA fund pawh hi a nihna takah chuan ka pawisa a ni lo a; mipui pawisa tho a ni. Chuvangin, mipui pawisa hmanga hmasawnna hnathawh reng reng a tha tur a ni,” a ti.