Entawn tlakte chu kan entawn hreh tur a ni lo : Lalduhoma

Vawiin (1.6.2022) khan Govt. Serchhip College leh Mizoram Youth Commission-ten Govt. Serchhip College-a Career Coaching Centre an buatsaih chu bialtu MLA, Lalduhoma’n a hawng.
Hawnna hunah hian Lalduhoma chuan thusawiin, Competitive exam-ah Mizote kan lang lo rei lutuk, tiin zirtirtute leh zirlaite kan inmawhpuh lek lek a, hei hi zirna in a changtlun loh chuan a tih theih loh a ti a, Delhi-ah sawrkar zirna sikul a tha tawh em em tih sawiin, “Engtinnge an tih bik? Entawntlakte hi chu kan entawn hreh tur a ni lo,” a ti. tunah hian zirtirtu post ruak a tam lutuk a, building chhia a tam lutuk a, heng tang hian result tha a neih theih loh a ni, a ti.
“Khawvelin a ngaih pawimawh chu Human resource development, education kan tih leh hriselna hi a ni a, ram changkang zawkte an hriselna chhan leh resource an mobilised theihna chhan chu an budget atangin an chang tam em a ni. Education leh Health hian budget atanga allocation an neih hi a percentage a sang em em a ni,” a ti a, ram changkangte tih ang ti turin kan sum dinhmun leh kan resource-ten a la tlin lo chungin education leh health sector hi chu priority-a kan dah a ngai a ni, a ti bawk.
Vawiinah hian thil thar kan la neih ngai loh, Career Coaching Centre bul kan tan dawn a ni a, a hlawhchham thiang lo a, nakinah chuan zirlaite pawh an pung ang a, amah leh amah a inenkawl theih hun pawh a la awm ang a, “Helai bial enkawltu ka nih chhung hi chuan he centre hi a hlawhchham dawn lova, sum leh paia harsatna a awm a nih pawhin a tul ang zelin kan inpui dawn a ni,” a ti.
Dr. C.Vanlalnghaka, Asst. Professor kaihhruaia Career Coaching Centre hawnna hun hmannaah hian PC Lalremsiama, Principal, GSC; Kawlthuama, President, Sub-Hqrs. YMA, Serchhip leh C.Lalhminghlua, president, MJA, Serchhip District-ten thu an sawi bawk a ni.
Dr. Zarzosanga, Coordinator, Career Guidance & Counselling Cell-in report a peka a tarlan danin, Coaching centre hi kum 2014 khan UGC atanga sum hmuh hmangin kalpui a lo ni tawh a, mahse zirlai tur an hmuh that loh avangin a tawp leh a, tunah hian bialtu MLA, Lalduhoma’n cheng nuai 2 a pek hmanga bul tanin, MYC nen MoU an ziak a, MYC atang hian Rs.2,80,000t- an la dawng dawn a, 1st Batch chu May thla atangin kalpui a ni tawh a, zirlai 24 awmin, 2nd batch hi June ni 6 atanga kalpui leh tur niin, zirlai 42 inziaklut awm tawhin, admission hi la hawn mek a ni a, faculty 17 an awm a, Group A leh B (Gazzetted leh Non-Gazetted) hna bakah entrepreneurship course kalpui a ni bawk a, tlai dar 4-7 inkarah class hi kalpui thin a ni.