Reithei bakber lutuk lova awm hi BJP sorkar ngaihpawimawh ber a ni -Vanlalhmuaka

India ram puma BJP in a sorkarna a hman kum 8 a thlen, thla khat chhung lawmna neih mek pualin vawiin khan BJP Mizoram chuan an office ah chanchinthar lakhawmtute an kawm a. BJP Mizoram president Vanlalhmuaka chuan rethei bakberh lutuk lova awm hi Khua leh tuite dikna leh chanvo a nih angin nasa zawka mipuite mamawh anga hma lak zel hi BJP sawrkar ngaih pawimawh ber a ni, a ti.
Vanlalhmuaka chuan BJP sorkar chuan kum 8 chhung khan India rama chenna tur in nei lo te tan chenna tur in vaibelchhe 1.2 Urban) leh vaibelchhe 2.3 Crore ( Rural) sak sak an ni tawh a. Kum 8 chhungin vaibelchhe 3.5 mirethei chenna tur in nei lo te’n in an neih phah ta ni, a ti a.
India ram Electric eng la luh lohna khua 19,000 ah kum 8 chhungin Electric eng pek fel vek niin, 100% household chu Saubhagya Scheme kaltlangin eng intinah pek vek an ni tawh a ni, a ti bawk.
Swachh Bharat Mission kaltlangin inthiarna in vbc.11.22 siam tawh niin, 100% sanitation Coverage mission hi kalpui mek a. BPL chhungkua Eirawngbawlna Gas connection la nei lo mi vbc. 9 hmeichhia te hmingin Free LPG Connection sem chhuah tawh niin, tun kum kal mekah hian vbc.1 sem belh mek a ni a. World largest health coverage scheme hnuaiah Ayushman Card vbc.18 a pe chhuak tawh a, he scheme hnuaia inziak lut mi vbc.3.2 zetin an chhawr tawh, a ti bawk.
Kum 8 kal ta chhungin Medical College 200 ram pumah hawn belh tawh niin, AIIMS pawh 15 zet hawn belh a ni tawh a. Medical stream hrang hrang zir theihna seats pawh 80% a tih pun a ni. Tunah hian District tinah Medical College din tura ruahmanna pawh chak taka kalpui mek a ni.
Free Vaccination Drive hmangin ni 477 chhungin mipui vbc.190 plus doses pek hman niin, khawvel ram 100 aia tam ah vbc.20 doses Make in India Vaccine thawn chhuah a ni bawk a ni.
One Nation, One Ration Card siam niin, mi vbc.80 zet te chu PM Garib Kalyan Ann Yojna kaltlangin Free ration kum 2 chhung deuh thaw pek an ni tawh a. Bank Account nei ngai reng lo ten kum 8 kal ta chhung khan mi vbc.45 ten Bank Account an neih theih phah a, he DBT avang hian cheng vaibelchhe nuaih 2.22 India sorkar chuan sum fai a hum phah a ni, a ti.
PM Kisan Samman Nidhi kaltlangin India ram loneitu mi vbc.11.3 hnenah tanpuina cheng vbc nuaih 1.82 pek chhuah tawh an ni a. National Highway siam pawh a hma aiin 208% a chak a kalpui a ni. 2013-2014 a NH siam chak lam chu 12 km/day a nih laiin, vawiinah chuan 37km/day a chak a siam chhoh mek a ni. Mizoram ah pawh tunah hian a zar zovin Rs.14000 Crore plus 740 km NH laih hna NHIDCL kaltlangin Central sorkarin a thawk mek a ni, a ti bawk.