Mizoram Pradesh Youth Congress Committee (MPYCC) chuan, Mizoram mipui tam takin harsatna nasa tak an tawh mekna ; damlote pawisa hmuh let tur Medical Reimbursement (MR) bill pek theih loh chungchangah Mizoram Health Care Society Office an tlawh.
Mizoram Health Care Society-a hnathawktute hi Health Care Bill-a cheng vaibelchhe 71 chuang tang mek avanga mipuiin harsatna an tawh nasat ziate, Congress Thalai President Dr. Lalmalsawma Nghaka leh a thawhpuite chuan an sawipui a ni.
Tun Sorkarin damlote pawisa bill a bat zat hi Lalhruaitluanga Bawihtlung, MPCC Secretary-in RTI atanga a zawhna chhanna atanga a lan danin April ni 30, 2022 thlengin Cheng 712,184,104 a ni.
Kan thu dawn danin, Health Care lama thawktute chuan theihtawpin Health Care-a bill tang mekte chu umzuiin, Finance leh Planning-ah te an nawr ve reng a, mahse sum harsat avangin hmasawnna erawh a awm hlei thei lo, an ti.
Dr. Lalmalsawma Nghaka chuan, “Mizoram Budget a pung chho tual tual a, chhiah hrang hrang atanga sorkara sum lut pawh namen lova nasain a pung mek a. Chutih lai erawh chuan mipuiin an ‘Safety Net’ ve atan Health Care-a an in ‘register’ thlap hnu leh, a Premium te pe a, anmahni lama an tih tur ti fel vek chunga hun rei tak an bill a tang hi a vanduai thlak hle a. Harsatna nasa tak an tawh phah hi a pawi kan ti hle a ni,” a ti a.
“Planning lam leh Finance Dept. lam pawh an mangang tih kan hria a, Non-Plan Expenditure a san lutuk vang tih a chiang hle. Kan Finance Minister leh Chief Minister ni bawk hian Mizoram mipui min hlawhchham pui hneh hle tih a chiang a, Speaker lar takin a sawi ‘Titi-a Distinction’ ringawt ni lo, hna thawk thei tak tak tur CM Mizoramin kan mamawh zia a ti chiang leh zual a ni,” Congress Thalai President chuan a ti.
“Old Age Pension, Sorkar hnathawkte hlawh a huna lak theih loh, GPF pawh lak chhuah theih loh, Pension pawh chinfel hleihtheih loh anih lai leh mipui an rum ngawih ngawih laia, mahni duhsak zawngte siam len nan te ; mahni sangawi zawnpuite tih lawm nan ringawt a, Mizoram mipuite chanvo Budget tlingkhawm inkhualtelem nana hmante hi Zoram mipui hian an hai miah lo tih Sorkar lai hian hria se kan duh. Health Care Bill-a vaibelchhe 71 vel lai la tang hi a rang lama sorkarin chingfel turin kan phut a ni,” Dr. Lalmalsawma chuan a ti bawk.
Dr. Lalmalsawma chuan, “Congress Sawrkar hun tawp lam December, 2018 khan Health Care sum bawmpuia dah tlingkhawm hi Vaibelchhe 155 lai a tling hman a. Mipui hnena bill pek theih loh bat khawl hi a awm ve lo a ni,” a ti.
“MNF Sorkarah sum tamzia leh chhiah a luh ṭhatzia sawi anih laiin, Healthcare-a in register-te ngei pawh an damdawiin awmna bill pe chhuak duh loa hetiang ang sum tam lutuk bat sak a, harsatna a siam hi Congress Ṭhalai chuan rilru nat thlak a tiin demawm a ti takzet a. MNF Sorkar hmasaah Healthcare sum Bajaj Alliance-ah dah tan a lo ni tawh a. Hemi avang hian damlo bill tang tam tak a awm phah a. Tun sorkarah ngei pawh mipuite hnena Healthcare sum tam taka tihtir siin, innghahna turin a awm si lo a ni,” Congress Thalai President chuan a ti bawk.
