Dr. Lalmalsawma Nghaka, Treasurer MPCC chuan Lengpui, Hmunpui, Rawpuichhip, Dapchhuah, Damparengpui, West Phaileng, Lallen, Phuldungsei te tlawhin West Phaileng-ah MNF chhungkaw thum – H. Zosangliana, Zoramthara, Ramdina Renthlei te chhungkua a lawmlut bawk a ni.
Dr. Mala chuan thusawiin, “Congress kan sorkar chhung khan thil tha tam tak tih kan nei a, retheihna ata mi tam tak khaichhuahin an awm a. Kan ram tan rohlu tam tak kan hnutchiat bawk.
“Chutihrualin, mipuite beiseiphak tawkloh leh thil tihfuh tawkloh kan neih te pawh kan hria a, chuvangin, kan thiltih fuhloh mipuite beisei kan phak lohnaah te ngaihdam kan dil a ni.
“Tuna kan ram dinhmun en hian a bik takin kuthnathawktute an mangang hle a, sorkar in titura a intiam a tihloh avangin Mizoram dung leh vangah chhungkaw tam takin harsatna an tawk mek a. Congress party chuan lungchhiatthlak kan ti a, rimtaka bianga thlan tui luang zawih zawiha hnathawk thin kan kuthnathawktute an beidawng mai ang tih kan hlau a ni.
“Congress hunlaia sorkar hnathawk ten a hun taka hlawh an lak te, Contractor ten a hun taka bill an lak thin ang te kha vawiinah chuan sorkar lai te hian intihtheih nan leh an thiltihthatah an ngai chho mek a. Congress laia kalphung pangngai kha, sorkar lai hian mahni infak nan an hmang chho zel hi a lungchhiat thlak a ni.
“Ration buhfai man ZPM sorkarin a tihsan tak avangin chhungkaw tam tak tan harsatna a thleng mek a. Chhungkaw tam takin an phurrit chinfel nana Ration buhfai man tlawm zawka an lei theih thin laia tun dinhmuna an harsatna tling ta zawk hi a pawi hle a. An insawi anga awm lo ZPM sorkar hi mipui hian thlak an chak tawh hlein a rinawm a ni. Lirtheia eizawngte tan Diesel leh Petrol man sang ringawt pawh hi a pawi hle a. Mipui hmangaihna a kawk lo hle a, an nitin eizawnnaah harsatna an tawk mek a, kuthnathawktute leh mi harsa zawk chhungkaw tan a pawi em em a ni.
“Universal Health Care ZPM sorkar duan thar pawh Private Hospital-te barh luih a tum avangin Mizoram chhunga kan Hospital neihte nen an la inhne rem thei lova, phai lam Hospital duhsak zawk anga lang thei tura ruahmana a siam zel hi a pawi hle a. Inremna tha zawk siam vat se, chu chu mipui tana thil tangkai leh thil hlu tak tur a ni, a ti a. Mizoram Doctor tha tak tak tena an din Private Hospital-te tana pawm theih tur Health Care system tha zawk duang a, siam tha leh turin Mizoram sorkar kan ngen a ni.
“Congress party hian kan mamawh milin policy kan siam zel a. Vawiina Kut hnathawktu ten an hman tangkai em em February 2, 20016 a hman tan Ni 100 inhlawh (MGNREGA) te pawh Centre a Congress sorkar laia duanchhuah a ni a. Congress hian mipui te hmasawn nan porgramme tha tak tak a lo duang tawh thin a, Centre ah pawh a siam thiam kan nihnaah Mizoram miltawka siam pawh hi kan thiam tih mipui ten min rin ngam turin kan ngen che u a ni.
“Mizoram Politics-ah hian Pathian hming leh Pathian thute hmaikawra hman kan chin hi sim a hun takzet a. Pathian tihna tak tak nena ram leh hnam kan kaihhruai hi a hun tawh hle a ni. Congress Party mipuite pawh Unit atanga Headquarter level thlenga kan inenfiah a, dik tak leh rinawm takin, Pathian duhdan anga kan kal hi a hun tawh takzet a ni. Chu chuan ram nuam min siam ang a, in hmangaihna dik taka kan inen pawh a beiseiawm a ni,” a ti bawk.
