Dt 17.3.2025 (Thawhṭan zan) khan Melriat MNF Unit chuan Melriat VC election-a an ‘solid’ lawmna hun BNRGSK Hall-ah an hmang a. He hunah hian Pu Tawnluia Core Committee member leh Ex Dy CM chuan a hmanpui.
Pu Tawnluia chuan thusawiin, “Miin ZPM chu enchhin an chak a, an enchhin a, an hrechiang tawh. Enchhin an dawl loh zia an hre tawh,” a ti a. Assam Rifle insawn tur chungchang sawiin, “AR insawn theih nan Pu Laldenga’n theih tawp a chhuah a, an insawnna tur Zokhawsang ram a ti fel. Pu Zoramthanga’n an camp tur zawng zawng a sa a, an tui lakna te, electric te, an mamawh kawngpui bakah vaibelchhe tam tak man thil hrang hrang a tifel vek bawk a. Kum 2019 khan AR an insawnna tur thu Home Ministry-in an tifel tawh a, kum 2020-ah insawn tur an tifel nawn leh. An chhuahsan ram pawh mipui tan tiin MNF sorkar khan Assembly-ah dan kan siam vek tawh bawk a. Zokhawsang pawh Amit Shah chuan a rawn hawng a nih kha. MOA chungchangah kan inbe mek a, kan hun a liam a, tunah tihfel a ni ta hi kan lawm a ni,” a ti.
Dy CM hlui chuan, “AR insawnna tura hnathawh tura 90% vel Pu Denga leh Pu Rama’n an tifel vek. ZPM hian kan hotute thawh fel sa a hmawr an rawn bawk mai a ni. An mahniin kum 1 chhung leka an thawh anga sawi hi a dik lo. ZPM hian Zokhawsangah sawn bawngtuthlawh cheh khat pawh an chek lo,” a ti bawk.
Pu Tawna chuan, “Nationalism-ah he sorkar hi a hnung tawlh nasa hle a, a tlanchhe nasa hle. Inthlan lehah hian Nationalist sorkar a ding leh dawn a ni,” a ti.
“Melriat-in MNF VC an solid thei chu lawmawm a tih thu a sawi a. Khawtlang tana an beihna kawngah, kan lo thlang dik mang e, an tih turin hma thawk ang che u. Sorkarah te kan lo awm ve tawh a, opposition VC an nih avanga malmak ngawt hi mipangngai tan chuan tih chi a ni lo. Dikna leh rinawmna nen khawtlang hruai turin ka chah che u a. Sorkar in dawrna kawngah pawh MNF VC-in in dawr dawn a ni lo a, Melriat khawtlang aiawh in ni a, inthlahrung lova sorkar dawr ṭhin turin ka chah che u a ni,” a ti a. “Pathian hnena ṭawngṭai chungin ram rawng bawl turin i inhlan thar ang u,” a ti bawk.
